Yow pynsñiawthooh ya kiwa seiñ khih seiñ khan hajrong kammon u tip wei skem yurim neibynta i khih i khan ki, neiliang ka yung krehkaam u General Manager District Commerce & Industries Centre, Jowai haka 10 tarik uni u bnai da pynman ko da ka Workshop wa chi sngi kawa haap hapoh ka Scheme wa tip kam ka Raising and Accelerating MSME Performance (RAMP).
Ha ka yalang wai ya kani ka Workshop ha Conference Hall ka DCIC, da emlang u General Manager DCIC, u B. Warjri, ka S.E. Kharpran, Functional Manager DCIC, u E. Pyrbot, Functional Manager DCIC, u S.Pale, IPO najrong kiwi won ki heh ka DCIC.
U B. Warjri kam u General Manager DCIC da ong u wa kani ka RAMP da pynwandur kyrpang neibynta u kyrchaan ya kiwa seiñ khih khnang yow ye ki u pynku yei kaam wa khih wa kreh ki. Kamtæ kyntu u ya ki u chah chkoor bha ki yei sikai na ki bru chemphang, kamwa neiliang ki sahep ka DCIC leh man ki kiwa smat u yarap ya ki ha kawon kawon ka por wa paan yarap ki.
U E. Suting, Principal Good Shepherd School, Khimusniang, Jowai kam u bru chemphang hawa e yei klam ha ka yalang wai ya kani ka Workshop, da klam e mynsien wei kyntu u ya kiwa seiñ khih u chimbynta chitrhem wei wow chim kabu leh ya kam kini ki laad wa wanrah da ka DCIC wei da pynchlur u leh wow wan chakhmat ha iwon iwon i por wa emkaam yarap ki.
Heijooh i por khana haroh u yei lai luti yong oo hi samen kiwa man kam i e mynsien ya kiwa chimbynta ha kani ka Workshop, wei ong u leh boonsien hi ki laad yarap wa e ka sorkar sepai hi-eh ki, i daw toh wa boon hi ki bru wa duna i tip wei duna ka sap kammon u pynlai yei kaam.
Na itæ i daw ban joor u hajrong i emkaam wow pteiñ thooh stat kamjooh leh wow ya chimbynta ha ki laad e sikai neibhah kam kini ye ki u yarap pynheh pynroi yei khih i khan yong ki.
Ka S.E. Kharpran, Functional Manager DCIC kyntu ko ya kiwa chimbynta wow sñiawtre yei sikai wa yoh ki, wei wym du wow pynemkaam hei khih Business tang wow e mynsien leh ya kiwi.
Chwa ini u E. Pyrbot, Functional Manager DCIC da e u i batai bniah hajrong kani ka Workshop kamjooh leh hajrong i thmu kani ka RAMP wa ki Scheme waphær waphær wa haap hapoh yong ka.
Discussion about this post