Kiwa yalehke ka India kiwa duna hei doh i pran (Para-Athletes) da chna parom ki deiwa yoh boon dooh ki takma neibynta ka ri ha ka Para Asian Games deiwa yoh 111 tylli ki takma wa kynthup ya ka 29 tylli ki takma ksiar, 31 tylli ki takma rupa wa 51 tylli ki takma tama.
Ka India da yoh ko 14 tylli ki takma ha u snem 2010, 33 tylli ha u snem 2014 wa 72 tylli ha u 2018.
Ha uni u snem ka India da yoh ko hei wa san iwa heh dooh i kyrdan nadooh wa sdang ya kani ka lympung wei da phah ko leh boon dooh ki yalehke kiwa em 303 ngut (191 ngut ki chynrang wa 112 ngut ki kynthai).
Na ki 111 tylli ki takma, ki kynthai da yoh ki 40 tylli ki takma iwa mut 36% na waroh ki takma.
Neiliang u Anurag Singh Thakur, Union Minister of Youth Affairs & Sports da ong u wa ini pynyoo ko yei kreh chitom kiwa yalehke wei da wanrah da ki Policy kiwa biang hapoh i yahkhmat u Prime Minister, Narendra Modi.
Da pynkynmoo u leh yei sdang yaka Khelo India Scheme wa da pynkrehkkam ha ki chnong ki thaw da ka thong wow pynyoh laad u pynyoo yei sap kamjooh yow sai ya kiwa yalehke wa daw rah naam ya ka ri deiwa sdang ya ka Target Olympic Podium Scheme (TOPS) iwa katni da pynyoo wa mihsoh mihsla.
Da khana u leh wa 8 ngut toh kiwa yalehke ka Khelo India wa 46 ngut naka TOPS kiwa da chimbynta ki ha kani ka Para Asian Games kiwa da yoh 38 tylli ki takam na ki 111 tylli. Chooh chooh da ong u wa ka mang poisa katni neibynta ki kaam yalehke da pynku da le chah hawa nujor wa u snem 2014 deiwa pybiang ya ki Coach, i lai yah cha baar ri yow sikai bniah, i pynbiang yei baam wa ki thaw yalehke.
Kamtæ da ong u wa i lehbha haka Asian Games wa dang dep wei katni won sa ha ka Para Asian Games wa haka Olympics, ka Paralympics, CWG, Deaflympics pynyoo ko wa ka India da nang ku ko ha ki kaam Sports. “Ka India toh kawa da ku wei daw ye i leh wow pdiang hadooh wow pynman ya ki yalehke wa heh kam ka Youth Olympics ha u 2030 wot yaka Summer Olympics ha u 2036.”
Discussion about this post