Katkam ka khubor na ka tnat Ministry of Road Transport & Highways, Government of India da ong ko wa nadooh wa pynkrehkaam ya ka GST da ku yei jngai wa ye ki truck u lai ha ka chi sngi da kamwa 30%.
Da ong leh wa katni ki truck da ye ki u lai hadooh 300-325 Km chi sngi lada nujor wa na chwa iwa 225 Km chwa u em ka GST.
I daw wa jia ini toh wa da wiar ki thaw pynsangeh kari ha u pood ki jylla iwa pynduna leh yei sahkut kari iwa pynduna leh yei lut san ki tre truck da kamwa 10-12%. I khrong dan heipor wa pisah na kawi cha ka wi ka jylla toh kawa chimpor bha iwa pynslem yei lai i wan ki truck wei hapoh chi snem ye ki u lai u 50,000 Km-60,000 Km iwa duna bha lada nujor wa ki truck hapoh ka USA kiwa lai hadooh 3 Lak Km ha ka chi snem.
Deiwa em ka GST ym emkaam de ki Company wow em ya ki Warehouse ha kawi pa kawi ka jylla neidaw wa phær i rukom kheiñ dan na kawi ka jylla cha ka wi nachwa.
Ha chwa ka GST, ka dan ya kiwa boon ki mar toh boon haap ki ha ka 26.5% tangwa ha ka GST won boon toh haap ki hapoh ka 18%.
Katkam wa ong u Nitin Gadkari, Minister for Road Transport & Highways and Shipping, da ong wa kiwa em ha kani ka kaam kit mar toh kiwa daw yoh nong bha neibhah ka GST daw pynduna ko ya ka dan yong ki kamwa 20%. Iwa ye u mih na ini toh wa daw boon wow thied ya ki truck wa heh kiwa ye u kit boon chisien kit neidaw wa daw hiar dor i bai lai bai wan yong ki.
Discussion about this post