Ka Mission Smile kawa da pynman deiwa ya krehlang ka Rashtriya Bal Swasthya Karyakram (RBSK) ka sorkar Meghalaya wa ka Dr. Norman Tunnel Hospital, Jowai da ye ki wow e yarap ya 31 ngut ki khynnah deiwa e yei pooid wa mynkna ya kiwa jæd ktien wei kaad poh ktien (Cleft Surgery) wa nyngkong wa pynman ha West Jaiñtia Hills.
Ya kini ki 31 ngut da jied na West wa East Jaiñtia Hills hadien wa pynman ya ka Screening and Surgery Camp ha Dr. Norman Tunnel Hospital, Jowai nadooh ka 10 tarik hadooh ka 13 tarik u November, 2025.
Na ki 31 ngut ki khynnah wa chah pooid 9 ngut toh neibynta kiwa jæd ktien wa 14 ngut won kiwa kaad poh ktien kiwa na West Jaintia Hills katwa kiwa na East Jaiñtia Hills da em 2 ngut kiwa jæd ktien wa 6 ngut won kiwa kaad poh ktien.
Neiliang u Dr. D. Malakar, Operation Head of Mission Smile Guwahati da ong wa kani man ko kawa da sdang ha ka thaaiñ Northeast ha u snem 2009-2010, hadien wa soi soskular Memorandum of Understanding (MoU) wa ka sorkar Assam ha u snem 2010 wa ka sorkar Meghalaya ha u snem 2013, wei nadooh kitai ki por da sdang wow pooid dei mynkna ha ka thaaiñ.
Ka Dr. D. Nongpluh, Medical Superintendent ka Dr. Norman Tunnel Hospital da ong ko wa ini i e yarap da wanrah ko yei kmen ya kini ki 31 ngut ki khynnah kamjooh ki bei ki pa ki.
Discussion about this post