Ka President ka ri, ka Droupadi Murmu ynnin ka sngi da pynkup ko ya ka Padma Shri Award cha u Risingbor Kurkalang heiyatoh wa ka Art wei uni toh uwa na ka jylla Meghalaya ha ka yalang Civil Investiture Ceremony wa da pynman ha nongbah New Delhi.
U Risingbor Kurkalang da tipmit ya oo kam uwa chna ya ki tiar wa har rukom wa ki tiar put tiar tem tynre.
Da kha ya oo ha ka 19 Khonchnglad 1978 ha Laitkyrhong, East Khasi Hills District wei ka-it u wow tem ya ki sur tynre wei da sdang chna u ya ki tiar put tiar tem wa har rukom nadooh u 2001 wei man uwa nyngkong na chnong yong oo wow chna ya kini ki tiar.
Ya u Risingbor da khut sñiawbha wow tem u ha u snem 1990 ha chnong yong oo wa ha All India Radio wa Doordarshan Kendra wei neini da sdang u wow pynyoo ya ki sap yong oo ha kylleiñ ka jylla wa ka ri.
Da jooh chimbynta u leh ha ka Vadya Darshan wa pynman da ka Sangeet Natak Akademi, New Delhi ha u snem 2002 wa ha ka 2nd Thoh Shun International Art Camp 2006 ha Sohra, East Khasi Hills District, Meghalaya. Da jooh pynwyrngia u leh ya ki paidbah ha ka International Festival on Inter-Cultural Dialogue hapyrdi ka North East India wa South East Asia (2010). Da chna u leh ya i sur ‘Mei Mariang’ ha ka thup ki sur rwai ‘Sai-thainki Sur’ da ka Khasi-Cymru kawa da pynlait ha u 2021 ha Naxos World. Da chah khut u leh ha u Gareth Bonello na Wales, United Kingdom wow pynwyrngia ya ki paidbah ha ka Rajasthan International Folk Festival (RIFF) ha Jodhpur (2022).
U Risingbor da dep yoh u ya ka Certificate of Appreciation na ka sorkar Meghalaya (2008), ka INTACH’s Martand Singh Memorial Award 2021, ka song poisa ha ka Handicraft Category kawa T.1 lakh na ka Indian National Trust for Art and Cultural Heritage (INTACH), New Delhi.
