Jowai: Ki pulit ka West Jaiñtia Hills da yoh ki wow pynlait hadooh 9 ngut ki kynthai kiwa hapoh 18 snem i rta, ynnin da yoh ki wow pynlait ya ki 5 ngut heiwa 4 ngut na kini da yoh u pynlait na iwi i yung wa em ha Mihmyntdu katwa ynne won da yoh u pynlait ya ki 4 ngut na kiwi kiwi ki thaw napoh ka District. Ya kini ki khynnah da pynemkaam bakla ya ki ha ki kaam wa man pyrchah aiñ (wow yahap kurim khlem biang rta).
U SP ka West Jaiñtia Hills, u Lakador Syiem da ong u wa hadien wa yoh yutip wa paka wa ya kini ki khynnah kynthai da pynemkaam wow leh ya ki kaam pyrchah aiñ namo wow khayi doh, wei katkam ki kyndon ka aiñ da man i i kaam slaitbor.
Neiliang u Lakador da pyntip u wa ini waroh da mih i hadien wa wiar kawi ka khynnah na kawi ka dong na Jowai, kiwa hayung yong kani ka khynnah da lai ki cha ki pulit ha ka 2 tarik uni u bnai wei hadien wa pynman ki pulit ya i takit da chem ya kani ka khynnah kawa ya tipmit wa ar ngut ki kynthai kawi na Sohkymphor kawi won na Nonjngi.
Ki pulit da pynman chooh ki yei takit wei da lai ki cha Kyrwen, Mowtyrchiah, wa kiwi ki chnong wow pteiñ ya i takit wei ya kini ki ar ngut da chem na Kyrwen wa na Mihmyntdu wei manda poi ha Mihmyntdu da yoh u pynlait chooh ya kam kini ki khynnah. Na kini ki khynnah wa da yoh u pynlait na Mihmyntdu da yoh chiboon ki yutip na ki wei neitæ da yoh u kem ya ki bru kiwa emkti wow khayi (agent) ya ki kamjooh kiwa thied (clients).
Chooh chooh ki bor pulit nadooh ka Special Juvenile Unit, ka Women Police Station, ka Child Line, ka Child Welfare Committee, District Social Welfare Officer wa kiwi ki chnat da booddien ki yeini wei da chemdien ki wa dang em kiwi ki khynnah kiwa da ngat ha kani ka kaam wow chah pynemkaam bakla, wei dei chimkhia ki bor da ye ki wow pynlait noh ya ki.
U Lakador da pyntip u leh wa waroh em ki kamwa 15 ngut ki khynnah kiwa chah pynemkaam bakla kamni hapoh ka District wei dang yooluti wa daw ye wow pynlait ya ki waroh.
Ki bru kiwa emkti wow khayi (dalal/agent) ya ki wow leh ya ini i kaam kynthup ki ya 4 ngut ki kynthai kiwa kynthup ya ka Dapynbiang Sten (26 snem) na Kyrwen, ka Riwandakaru Dann (22 snem) na Ladthadlaboh, ka Kristina Lyngdoh (18 snem) na Sohkymphor wa ka Sanwaki Dkhar (28 snem) na Khliehionriang.
Ki chynrang kiwa da pynemkaam (slaitbor) ya kini ki khynnah kynthup ki ya u Lemi Ryngkhlem (20 snem), u Elison Dkhar (20 snem), u Emryngkatmitre Dkhar (20 snem) wa u Prosperity Talang (22 snem) wei waroh kini ki soo ngut toh na ka chnong Demthring.
Ki pulit da ong ki wa dang pteiñ ki wow takit yeini wei daw kem chooh ki ya kiwi lada chem wa emkti ki kam ha kini ki kaam pyrchah aiñ.
Ya kini ki khynnah da phah ya ki cha Hospital wow pyntikna yei rta ki wei wow yoh ki yei sumaar wei katni da booh chipor ha ki Shelter Home wow yoh yarap ki kam ki Counselling wa kiwi kiwi. Kini ki khynnah toh kiwa napoh ka District tangwa daw pynsakhiat yeitæ waroh wei em leh kiwa na Jowai hi.
Neiliang u Lakador Syiem da kyntu u ya ki bor chnong, ki seiñbhalang wa kiwi kiwi wow yakrehlang wa ki pulit wow pyndoohjait ya kam kini ki kaam wa man pyrchah ya ka aiñ wa ki khynnah kynthai.
Ya kini ki 8 ngut kiwa da chah kem da pynngat ya ki hapoh ki kyndon ka aiñ POCSO, IPC, Immoral Traffic (Prevention) Act 1956 wa kiwi kiwi wei ynne ka sngi da wanrah ya ki hakhmat ka yung Kasari.
Discussion about this post