Ki pulit ka West Garo Hills District kam chibynta wow pteiñ yei yaleh pyrchah wow kem yaki damok kiwa pyntieñ pynsmiej ya ka imlang sahlang deiwa rah bor yaki bru yow dawa poisa, neiliang ki pulit ka District da yoh ki wow kem ya kiwa emkti ha kini ki kaam heiwa da yoh leh wow pynlait ya uwa chah rah yabor deiwa khlem su yaka poisa.
Ya kini da yoh wow kem naka thaaiñ Tikrikilla da ki pulit ka Bogularbita Out Post Police hadien wa da pynman yei thooh wa joor wei da kem ya ki soo ngut kiwa emkti wow rah bor ya uni u bru wei haka sngi wa bood da kem sa uwi deiwa yahkhmat u Addl. Superintendent of Police.
Hadien wa phla kiwa chah kem, deiwa yahkhmat u SDPO ka Raksamgri hei emlang ki pulit ka Tikrikilla Police Station da chem ki yaki suloi wa kiwi de ki sabut wa pynemkaam yow leh yaki kaam pyrchah aiñ.
