Nei joor u slap deilang waka la’ær wa wanrah ka æryong Remal da pynchlai um cha waroh ki wah, heiwa ynnin ka 29 tarik ki heipor kamwa 5:00 waje i janmiet, ki pulit yong ka Phramer Traffic Cell chirup wa ki Fire and Emergency Team, Jowai deiwa ya krehlang ki dkhot yong ka Dorbar Chnong Ialong da yoh ki wow pynlait im ya uwi u warep uwa na chnong Muthlong uwa sah ha Ialong uwa tip kam u Mar I Lyngdoh (35 snem) uwa da sahkut cha pyrdi ka pynthor Ialong neidaw wa heh um syndet syndet.
Ini da sdang jia i heipor 3:00 waje i sngi heiwa uni u warep dang pynkhooid yulam um u heiwa ka um wa wan neiliang Syntu Ksiar da wan syndet ko, wei ym chem luti de u wow phet na ini i thaw.
Heini i i por da poi ka Phone na uwi u warep uwa tip pyrtuid kam u Shi Dhar uwa na chnong Ialong uwa da khana yeini wa jia heiwa neiliang ka chnong da paan yarap ko wut wut na u Officer In-Charge ka Phramer deiwa kyrpaad leh ya oo wow khut ya ki Fire and Emergency Team na Jowai yow e yarap ki.
Manda poi ki pulit da pynemkaam ki da ka lieñ yow lai pynlait ya uni u warep ha ka yaleh wa chyrkhei kawa da sdang nadooh heipor 3:00 waje wei da ye wow wanrah oo cha rood hadooh i por 5:30 i janmiet neidaw wa da kær kut da ka um soodong soo kun ya oo.
Neiliang yong ka Dorbar Chnong Ialong da e khublei wei da yaroh ko yei chlur ki pulit ka Phramer Traffic Cell wa Fire and Emergency Service.
Na ka Phramer Traffic Cell da em u Arkini Dan, u Francis Kurbah, u Wompher Mi Lyngdoh wa u O Shwa Sungoh.
Na Fire and Emergency Service da em u S.O. A.Rymbai, U FM D. Lamare, u FM M. Singh, u FM K. Kharjahrin, u FM W. Pohthmi, u FM M. K. Baitha, u HGV G.G. Pala FM, u HGV K. Dhar FM, u HGV FM P. Sariang, u D/C HGV FM S. Pala.
Da e khublei leh ya waroh ki dkhot ka Dorbar Chnong Ialong wa da yarap wei e mynsien wow nang yoh ki yei kyrkhu na u Blai kynrad ha waroh ki liang yei lehbha yong i.
I pyntip na u Waheh Chnong ka Ialong, u T. Ram Phawa.
Discussion about this post