Kam chibynta wow yarap yei pynlang jhep ha ki thaw wa em cha palatsor, neiliang ka MLA ka Sutnga-Saipung, ka Santa Mary Shylla da e kti ko ya ka Truck kit jhep wa da yoh lyngba ka District Mineral Foundation (DMF) Scheme, East Jaintia Hills District yong u Financial Year 2025-2026 cha ka chnong Jalaphet-Bri Sutnga ha ka 29 tarik ha ka yalang wa da pynman ha Mooshut Pyrdung Community Hall.
Da ya emlang ha kani ka sngi wa u Deputy Commissioner ka East Jaintia Hills District, u Shivansh Awasthi, u EM ka JHADC uwa man leh u MDC ka Sutnga Narwan, u Seiborlang Shadap, u Block Development Officer ka Saipung C&RD Block, u Dr. R. Pyrtuh, u waheh chnong ka Jalaphet-Bri Sutnga, u Bevan O Dkhar deilang kiwa chong chnong wa kiwi de.
Ka MLA hawa e yei klam da ban joor ko yeiwa emkaam u man kiwa lehkhooid wei deiwa em kani ka Truck daw yarap ko wow poi cha kani ka thong yow pynman ya ka chnong kawa khooid.
Da pyntip ko leh wa ka Jalaphet Bri Sutnga toh ka chnong wa le wa em hapoh ka Saipung C&RD Block wow yoh ya kam kani ka Truck kit jhep wei da yooluti ko wa ini daw yarap ko ya ka chnong wow man kam kawi na kiwa khooid dooh.
U DC da pyntip u wa da jied ya ka chnong Jalaphet Bri Sutnga neidaw wa man ko kam kawi na ki chnong wa boon bru hapoh ka District wei da em hok wow yoh ko ya kani ka kari.
Da pyntip u leh wa ha ki por wow wan daw yabhah yei jhep hapyrdi kiwa daw pyut wa ki wym pyut heiwa ya kiwa hoi daw pynkylla ki chei sboh katwa ki wym hoi daw phah ki cha ki karkhana Cement.
Hadooh kattæ da em 6 tylli kam kini ki Truck kit jhep kiwa da e cha ki 6 tylli ki chnong kiwa da pynyoh hapoh ka District Mineral Foundation (DMF) Scheme.
Discussion about this post