Jowai : Ynne ka 31 tarik ka chnong Mustem da yoh skur thymme ko kawa wan wai da u ma Stephanson Mukhim u MLA ka chnong. Kani ka skur da tip pyrtuid kam ka Mustem Secondary School.
Ha kani ka chnong em ko 7 tylli ki L.P. School wa kynthup nadooh ki skur sorkar wa skur samen (private) wa kawi ka U.P. School heiwa ka dorbar chnong da slem da em ko i thmu wow pynku kyrdan cha ka kyrdan Secondary, kamtæ ha uni u snem da ye u pynman sakhiat ya ini i thmu ka chnong wei ya kani ka skur daw pait da ka chnong.
U waheh chnong u ma Dunno Nongpluh ong u wa lyngba i yarap u MLA warim ka thaiñ u ma Lahkmen Rymbui wa u MLA wa katni yong ka chnong da ye u wai ya kani ka skur ynne ka sngi. Ong u leh wa ha wada sdang ya ka skur, boon ko i eh wa boon hawa pyrkhat nadong chadong, tangwa dei krehlang ka chnong da sdang ya ka skur wei kyrmen u heh u roi ko neini cha khmat.
Kiwa klam da kyntu ki yaki nonghikai kiwa yahkhmat ya ki khynnah wow chimkhia ki yei kaam yong ki yow pynmih ya ki bru wa stat wa sian ha ka chnong ka thaw.
Discussion about this post