Ka Jaiñtia Hills District Unit ka Meghalaya Veterinary Services Association (MVSA-JHDU) da pynman ko ya ka Farmers’ Training-cum-Workshop ha Community Hall ka chnong Raliang, West Jaiñtia Hills District ynnin ka 27 tarik deiwa yaklam hajrong kiwa boon ki phang wa yatoh wa i ri mrad wa i psan syiar kamjooh yow man kiwa skem hei emkaam yong ki.
Neidaw wa em ki kyndon yada COVID-19, da chah wow chimbynta du 50 ngut ki warep kiwa na Raliang, Laskein, Nongkynrih wa Madankynsaw. Heiwa da yoh ya ki kyntien pdiang sñiawbha ya kiwa da ya emlang na ka Dr. E. Passah, Sr. A.H. & Veterinary Officer, Poultry Farm, Jowai kamjooh da pdiang sñiawbha leh ya ki dkhot ka MVSA wa kiwi kiwa da chah khut sñiawbha cha kani ka e sikai.
Neiliang u waheh chnong ka Raliang, u S. Sanki Lamare da pynsñiaw u yei kmen wa ka MVSA-JHDU da jied ki ya ka chnong yow pynman ya kani ka yalang wa emkaam deiwa yooluti wa daw yoh myntoi bha ki warep na ini.
Neiliang u Dr. B.S. Langbang, BDO, Laskein da yaroh u ya ka MVSA-JHDU wa pynman ko ya kani ka e sikai deiwa ban joor u yei emkaam wow saam wow pynpoor lang yei stat heiyatoh wa i rep katkam i stat ka juk wa katni.
Neiliang u Dr. D. Lyngdoh, BDO, Amlarem da pynsñiaw u leh yei myntoi wa yoh nei psan mrad kam ki syiar wei da pynchlur u leh ya ki warep wow pyntip lang cha kiwi yei e sikai wa da yoh ki ha kani ka sngi.
Neiliang u District A.H. & Veterinary Officer, East Jaintia Hills, Khliehriat, u Dr. P.B. Nongpluh da yaroh u ya ka MVSA-JHDU wa da pynman ko ya kani ka e sikai deiwa kyntu ya ki warep wow chimbynta bha dei miat wei wow ap bha dei miat yeiwa e sikai yow yoh myntoi ki wei kamjooh yow pynemkaam ya iwa da yoh sikai.
Da yoh leh yei klam na ki warep kam u Wimon Dkhar, Raliang uwa da pynsñiaw yei sñiawngooh ya ka MVSA-JHDU, deiwa ong wa da man sakhiat ini i e sikai iwa yoh myntoi bha.
Ya ki kyntien e khublei da yoh na u Dr. F.R. Shadap, Secretary, MVSA-JHDU.
Ya ki e sikai da pynlai da ka Dr. I.D. Slong, Sr. A.H. & Veterinary Officer, Pig Farm, Khliehtyrshi. Wei ki bru kiwa da e yei sikai toh u Dr. P. Sumer, u Dr. C. Passah, ka Dr. F. Dhar waka Dr. R. Talang kiwa da klam hajrong i pynmih dud masi, i psan sniang, i ri syiar wa kiwa de wa emkaam yow man kiwa skem hei emkaam yong ki.
Ha kani ka sngi da pynkup burom leh ya u Pyrshang Biam, Laskein uwa ri syiar waka Nichwa Dkhar, Raliang kawa ri sniang kiwa da lai bha chakhmat ha ki kaam yong ki.
