Jowai: Hei yatoh wa kammon u man kiwa pynkhreh wei tip u yarap ya kiwi lada jia wa khih khmih næ tyngkhooh heiwon iwon i jia mynsoo mynsnam, neiliang ka Meghalaya Administrative Training Institute (MATI) Shillong chirup i krehlang waka District Disaster Management Authority, WJHD da pynman ko yaka esikai wa ar sngi haka 18 wa 19 tarik uni u bnai neibynta ki wakreh sorkar haki chnat krehkaam waphær waphær.
Ha kani ka e sikai ki bru chemphang napoh ka chnat IRCS Meghalaya State Branch wa kynthup yaka D.E. Kharshiing General Secretary, u P Deb Organiser, ka B. Thangkiew Asst. Organiser, da chim ki yei bynta wow pynsñiawthooh næ pynyoo yaki laad ki luti wa toh u pynkhreh næ e yarap lada jia khih khmi, jia i ya tyngkhooh kari wa kiwi kiwi ki bor pynjæd pynpra ka rymaw.
Heijooh i por kyntu haroh ki deiwa ong wa emkaam u man kiwa yakrehlang neibynta i bha ka imlang sahlang, wei napyrdi iwi pa iwi em hi i duna tangwa dei yakrehlang won daw wanrah ko i toh i tne.
Neiliang u District Disaster Management Authority, WJHD u Ebormi Langshiang ong u, i hi ha samen samen toh u man kiwa yarap wa nyngkong lada jia khih khmi heiwon iwon i por hei thaw wa i em i. Wei kam kiwa daman bei man pa toh u sikai haroh yaki khon ki kti wa kammon u man kiwa pynkhreh wow yada yaki hawa em ki ha skur kamjooh ha yung.
Neitæ kam kiwa em i bah khlieh neibynta ki yung krehkaam sorkar, kyntu haroh u wow pait bniah ki yei rukom man kitu kiwa em duna la ha i thaw kreh khang yow ye u e yarap yaki.
Haka sngi nyngkong wa sdang ya kani ka e sikai da wan wow wai yaka da u CEO ka DDMA WJHD u B.J. Kharshandi MCS uwa da man leh kam u kongsan.
Discussion about this post