15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Kular u James yaka KSU Laskeiñ Circle wow booh Police Out Post ha ki thaw wym em kajia pood ha Block-I ka WJH

0 Comments

Jowai: Neiliang ka Khasi Students’ Union, Laskeiñ Circle West Jaintia Hills District, ynnin ka sngi da yachem ki wa u James Sangma u montri wa pait yaka kaam pohyung wow dawa booh yaka Police Station lane daki Police Out Post wow yada yaki paidbah wa sah haka thaaiñ khappood Block-I kawa em ha West Jaintia Hills khappood waka Karbi-Anglong, Assam neibynta wow chong chngaiñ ki paidbah.

Haka dorkat, da ong wa ki bru Pnar wa sah ha kani ka thaw ha kiwa boon ki por da chah pyndik ki haki pulit ka Assam, ka chnat Forest ka Assam wa kamjooh haka seiñ KNV wa UPDS.

Advertisement ad1

Ka seiñ da ong ko wa da slem da dawa ko wow booh yaka Police Out Post ha chnong Psiar kawa em hapoh ka West Jaiñtia Hills District wei neiliang ka chnat ka chait ka khiah ka jylla leh da booh ki yaka Health Centre ha kani ka chnong kamjooh ka MeECL da pynbiang ko yaka bordiñ.

Da beiñ leh yaka sorkar warim wa yahkhmat da u Dr. Mukul Sangma heiwa u HDR Lyngdoh jooh man u kam u montri kaam pohyung kiwa ym jooh ap yeiwa dawa ki paidbah wei da yooluti wa ka sorkar wa thymme u leh ko yeiwa emkaam neibynta ki paidbah wa sah cha khappood.

Kiwi de ki dawa toh wow booh Police Out Post ha Psiar lane ha chnong Moluber, u pynku kyrdan yaka Raliang Police Outpost cha ka Police Station wei wow booh yaka Police Out Post ha chnong Mukroh kawa em hajan u pood waka Assam.

Neiliang u montri da ong u wow booh Police Out Post ha Psiar lane Moluber man ko kawa ym ye u leh neibhah hap burom yaka rai wow neh kamwa man namo ka Status Quo kawa da ya soi hapyrdi ki ar tylli ki sorkar jylla, tangwa neiliang ka seiñ da pynbor ko ya u montri wow booh Police Out Post ha Khatkasla khnang wow pynsuk yaki paidbah khappood heiwa u James da jubab u deiwa ong daw thooh bniah u yow pyntikna ya kani ka thaw wei lada man ko ka thaw kawa ym em i kajia pood daw smat u wow booh.

Heiyatoh won wow pynku kyrdan yaka Raliang Police Out Post cha ka Raliang Police Station da ong u James wa daw chimkhia katkam i em poisa ka sorkar.

Yow booh Police Out Post ha Mukroh, neiliang u montri da ong u leh wa ya kani daw phah yaki bru sorkar wow lai thooh bniah yaka thaw wei lada man ko ym toh ka thaw wa em i kajia pood da kular u wow booh Police Out Post ha katai ka chnong.

Previous
Next

0 Comments

Leave a Reply