Haka e sikai ya kiwa chong chnong ka Loomiongkjam, Jowai wa kammon wow pynkhlaad yaki jhep wa ye u pyut wa ki wym pyut deiwa sdang na man ki thlu yung. Neiliang u Dr. Rev. H.H. Mohrmen kam u bru chemphang da ong u wa i jhep wa mih naki yung ki sem ye ki wow pynkylla spah neibhah wa na i jhep wa pyut ye wow pynkhlaad haki ar bynta kitæ wow chna baam sñiang wei wow pynman sboh neibynta wow thung jhoor wa kiwi de.
Ka phang wa oo rap batai bniah u toh hajrong kammon wow pynkhlaad neibynta ki baam sñiang wa ya ki kattu katni ki wym wym biang wow booh ha i baam sñiang ye wow pynman sboh. Da pyntip u leh wa haka Society wa kreh u ka SURE da pyrchang bha wow leh yeini.
Katwa ki jhep wym pyut won kam ki klong, ki kot ye wow pynlang wei dai won cha ki bru wa thied ya kiwa kam kini neibynta wow ye u pynemkaam biang (Recycle).
Da ong u leh wa deiwa leh kamni daw ye u pyndait thah ya ka thma jhep wa ka imlang sahlang da maad ko, neibhah ini ye i wow pynduna chiboon i pynmih jhep neibhah du wow pyrkhat bait wow thooh ya ka thaw noh jhep namo ka Land Fill man ko kawa eh wow yoh.
Hawa yatoh wa ki kynja Plastic won ong u wa hei yong sakhiat em ka aiñ wa ki karkhana Cement toh u chim ki ka bynta wow pynemkaam hawa thang ki hapoh ki tyndur ka karkhana.
Ini man ko leh wow yarap yow yada yaka rymaw wa ki soodong sookun, khamtam kam ha Jowai yaka wah Myntdu kawa neiliang ka seiñ “Khooid Yaka Wah Myntu” da yaleh ko katwa ye yow pynsñiawthooh yaki paidbah wow kiar nei noh jhep khiar cha ki chariñ ki um ki wah.
Ha kani ka sngi da yoh leh yei klam na u Bajop Lyngdoh uwa man kam u dkhot ka SURE, kam uwi wa ri sñiang leh ha i jooh i por da khana u wa jooh lai kit u ya ki baam sñiang naki yung wa yaleh wow pynkhlaad kamni.
U K.L. Pariat, President ka “Khooid Yaka Wah Myntu” hawa klam wai phang u ong u kamwa man katni ha Jowai ki paidbah da yoo ki du ya i jhep wa lang ha Iawmusiang tangwa da em leh kiwa da noh cha ki soodong, ki chariñ ka wah Myntdu kiwa daw ktah yaka um wa pynthor neidaw wym em wa yoo ya ki.
Ya kani ka pynsñiawthooh paidbah da pynman daka seiñ “Khooid Yaka Wah Myntu” deiwa ya krehlang waka Society for Urban and Empower (SURE) wei da man ko ka sien wa le wa da lai e sikai cha kiwa chong chong ka chnong Jowai.
