Kam chibynta wow pynchkeh yei chakri ha ki kaam wa yatoh wa i chait i khiah, neiliang ka yung krehkaam u District Medical and Health Officer, West Jaiñtia Hills ynne da pynman u ka yalang ha District Library Auditorium, Mynthong, Jowai yow saam ya ki Tablet cha ki ASHA kiwa em hapoh ka Thadlaskein C&RD Block wa Laskein C&RD Block.
Ha kani ka yalang da wan wow embynta da u MLA ka Jowai, u Wailadmiki Shylla kam u kongsan deilang wa u Deputy Commissioner, u B.S. Sohliya chirup u DMHO, u Dr. K Dhar, u Dr. H. Niang, BDO ka Thadlaskein C&RD Block wa kiwi de.
U Wailadmiki Shylla hawa e yei klam da yaroh u yei kreh chitom ki ASHA wow yarap ya kiwa chong chnong wa em cha kdong cha chmiang khamtam kiwa punkhon kamjooh wow pynsñiawthooh yeiwa emkaam i chait i khiah wa i krehkaam ki Scheme wa e yarap ka sorkar.
Da ong u wa i pynemkaam da kini ki Anroid Tablet daw yarap bha ko ya ki ASHA yow ye ki u leh yei kaam ki deiwa bha wa pliah iwa daw pynku leh liang wanang heiyatoh wa i sumaar sukher.
Ka Thadlaskein C&RD Block toh kawa em kawi ka Community Health Centre (CHC) wa le tylli ki Public Health Centre (PHC) deiwa kyrchaan ki 170 ngut ki ASHA.
Ka Laskein C&RD Block toh kawa em kawi ka Community Health Centre (CHC) wa san tylli ki Public Health Centre, kiwa kyrchaan da ki 100 ngut ki ASHA.
Discussion about this post