U Mayalang Pakem uwa man u khon u Plan Lyngdoh wa ka Stillda Pakem uwa chong wa sah ha Mynthong, Jowai da yoh khur u ya ka Takma Ksiar ha ka lympung pynyoo dohksah kawa tip kam ka 2nd Mr & Ms Asia Bodybuilding & Fitness Championship 2026, ha ka kyrdan Senior Men’s Body Bulding (55 Kg) kawa da pynman ha Shri Aurobindo Institute of India Culture, Shillong ha ka 10 tarik uni u bnai.
U Mayalang Pakem toh uwa chah hikai ha u Dr. B. Desire Kynjiñ uwa man kam u Coach kamjooh u tre ka Satar Gym Ummulong.
U Mayalang toh uwa dadep jop ya kiwa boon ki yakob Bodybuilding kiwa heh hapoh ka ri India wa kynthup ha ka Mr. & Ms. India Natural Men’s Physique wa ka Mr. & Ms. East India (Zonal Bodybuilding & Model Championship) kawa da pynman ha Guwahati ha u bnai Thohlakhmi (February) uni u snem.
Neiliang u Mayalang da ong u wa kani man ko kam ka nongmuna ya kiwi ki khynroo khyllood wa ini i jait yalehke yarap ko wow lait na ki kaam wa sih wa boon jait wei pynlait ko leh nei khia pyrkhat, i diaw mynsien wa kiwi de, kamtæ da pynchlur u ya kiwi kiwa em yei thmu wow poi chakhmat wow pyrchang ki da kani ka yalehke kawa pynyoh leh yei chait i khiah.
Da kyrpaad u leh ya u Montri ka chnat Sports ka jylla wow kyruiñ khmat u cha kani ka yalehke wa tip kam ka Bodybuilding & Fitness neibhah em boon kiwa em yei sap wei kiwa emkaam leh yei yarap deilang i pynchlur kiwa ye wow wanrah burom ya ka jylla Meghalaya.
Ha iwi won i liang, ki lok u Mayalang hei yahkhmat u Ebenezer Sutnga wa u Heibor Pariat da pdiang burom ki ya oo hei miet ka 11 tarik heipor wa poi u cha Jowai.
I thmu kini ki chi lok wow pdiang burom ya u Mayalng toh kam wow e mynsien ya ki khon khynroo ka Ri-loom Jaiñtia wa rah naam ha kiwon kiwon ki jait yalehke wa ki lympung.
Da kyntu ki leh ya ka sorkar wow kyruiñ cha kam kini ki khynroo ha i lai luti yong ki.
Ki chi lok da ong ki leh wa ymtoh du ha kani ka sngi u leh ki yeini i kaam wa bha ha ka imlang sahlang.
Kam wow kdaw heini, ki le ngut na Ri-loom Jaiñtia wa kynthup ya u Mayalang Pakem, u William Rymbai wa u Lucky Kynjiñ da rah naam ki ha kani ka 2nd Mr & Miss Asia Body Building & Fitness Champion.
Discussion about this post