Ka Meghalaya Farmers’ (Empowerment) Commission da pyntip ko wa ka Lakadong Turmeric Cooperative Union Limited, Jowai hei kyrchaan ka Directorate of Horticulture, Department of Agriculture & Farmers’ Welfare ka sorkar Meghalaya da yoh ki yei tipmit lyngba ka Geographical Indication (GI) Tag ya u chirmit Lakadong ha ka 30-03-24.
U chirmit Lakadong toh uwa da pawnaam hei bha i miat u deiwa em u ya ka Curcumin kawa 7% hadooh 12% hawa nujor wa kiwi ki chirmit wa em da 2-3% wei ini toh iwa yarap yei chait i khiah kamjooh iwa pynbang yei baam wa chet wei man u leh uwi na ki mar wa pynmih na Meghalaya wa pawnaam bha.
Ini i pawnaam u heijooh i por da wanrah ko yei chim kabu ha kiwi kiwa da kam wa u chirmit wa dai ki toh u uwa na Lakadong hanla uwa da pynmih na kiwi ki jylla iwa da ktah yei naam u chirmit ka Lakadong.
Kamtæ neiliang ka sorkar deiwa ya krehlang ki chnat wa boon da sdang ki yei lai luti yow pynyoh yei tipmit GI ya u chirmit Lakadong soo snem nachwa itæ nadooh u Naichiphaw 2019 heiwa da thung da ka Committee wow thooh ya ka IPR Firm ka wow leh yeini yow yoh yei tipmit GI.
Hapoh uni u Geographical Indication (GI) da tipmit yei thaw wa da mih uni u chirmit, i miat i bha u wei kini ki GI toh kiwa da tipmit hapoh ka World Trade Organisation.
Da ini daw pyntikna ko wa ki warep daw ye ki u dai hei dor wa biang kamjooh daw yada i yei hok mantre ki ya u chirmit Lakadong.
Discussion about this post