U khmi wa khlanbor 5.8 ha ka Richter Scale da khih u ynnin ha Assam uwa da wanrah yei tieñ ha kiwa boon ki bru tangwa i Video ka CCTV na ka Neonatal Intensive Care Unit (NICU) ka Hospital ha sor Nagaon da pynyoo i yei chlur ki Nurse wow yada ya ki khonboo klem da yut khlem da ieh ki.
Ini i Video da poor bha i ha ki Social Media iwa da yoh leh yei yaroh na kiwa boon.
I Video wa da riñ heipor 4:40 i janmiet ha Aditya Nursing Home, da yoo ya ar ngut ki Nurse kiwa da yieñ wow ksoh ya ki palong wa pynthiah ya ki khonboo hapoh ka NICU heipor wa khih u khmi.
Kawi ka Nurse da ksoh ko ya ar tylli ki palong wa em khonboo kawi won da kah ko yei khonboo katwa dang khih ki tiar wa em ha kani ka NICU kam ki yit, ki tadong Oxygen wa kiwi ki tiar sumaar.
Ini i chlur kini ki nurse da yoh yaroh bha i heiwa da em leh kiwa ong wa toh u pynkup burom ya ki.
Discussion about this post