Yoh yungskur wa thymme ka St. Loreto RCLPS Thadsning, West Jaiñtia Hills nei yarap u MDC

Jowai: Ynnin ka 17 tarik da wai ya ka yungksur wa thymme wa tip kam ka St. Loreto RCLPS Thadsning da u MDC yong kani ka thaaiñ u Rudaioo Tang wei da yoh ya ka kyrkhu na u Fr. John M. Myrboh uwa man kam u Parish Priest ka Barato Parish hei emlang kiwa yahkhmat ka chnong, kiwa sikai, ki khynnah skur wa kiwa chong chnong ha kani ka chnong.

Ha kani ka sngi da yoh ya i klam na kiwa sikai kiwa da khana wa nadooh u snem 1962 wa seiñ ya kani ka skur da haap u pynman skur ha yungtrep wa da tymmoh da i skum wei hadien da pynman ha yung Club ka chnong wei du hadooh katni wa da yoh uwa mihkhmat uwa da yoo yei chitom ki paidbah da e u ya kani ka yungskur lyngba ka MDC Scheme wei da pynsñiaw ki yei sñiawngooh wa khroo ya u MDC.

U Secretary chnong u Titus Sajem hawa e yei klam da ong u wa nadooh u snem 1962 wa seiñ ya kani ka skur ym em wot ka kamra puræ wei katni wa da yoh ya u MDC uwa leh yaka kaam da yoh wow yoo ya ki kamra kawa da toh hok wa kani ka skur u ku kyrdan noh ko neidaw wa kani ka skur toh kawa da rim bha wei man ko ka skur wa nyngkong ha kani ka chnong wei da pynsñiaw u leh yei sñiawsih wa ha kat kini ki snem ym em uwi leh uwa mihkhmat paidbah wa yoo wei wa pyrkhat ya kani ka skur.

Da ong u leh wa ha u snem 2014 da yoh ya u MDC wa da kreh ym du da ki ktien uwa da e leh boon ki Scheme cha kani ka chnong wei da emlang u wa ka chnong ha kiwon kiwon ki bynta.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U Father John hawa e i klam da kyntu u ya kiwa sikai wow hikai hok ya ki khynnah wei da kyntu u leh ya ki bei ki pa wow phah skur ya ki khynnah wei ym toh wow phah chong chakri ya ki cha ki yung ki bru khnang waka mynried ka yong ki kamjooh ka chnong ka thaw waka jaitbru u ku ko chaphrang kamwa ku kiwi.

U MDC hawa e yei klam yong oo da ong u wa ym kwah wow ngat ha ki kaam baam-tooh wei smat u leh wow e yarap naka tulop.

Da e leh u sa ya kawi ka Scheme wa T. 1 lak wow yarap chna yeiwa jæd wa pra wei da pynsñiaw u leh wa em i thmu wow e tin yung cha ki paidbah wei wow pynbiang leh ya um-baam umdih ha kani ka chnong.

Neiliang yong ka chnong da pynsñiaw ki wa u MLA, MP leh ym jooh em wanrah ki iyi iyi leh hapoh ka chnong kamwa da leh u MDC. Wei da kyrmen ki wa daw yoh yarap ki leh na u MLA yow man ka chnong kawa thymme u man ko kam ki phlim Colour ym toh u sah kam ki phlim wa rim da ka Black & White.

Ha kani ka sngi da pynchongchit chooh chooh da ki chaad wa ki yalehke drama.