Shillong: Kiwa yalehke ka Meghalaya da hiar ki cha Shillong kam chibynta ka Meghalaya Games 2019-20 kawa da pynman biang hadien 10 snem.
Kawa yalehke ka Ri-Bhoi ka Joytiful Narlong, kawa yoh takma ksiar haka 100m wa Long Jump ynnin u snem haka State-Level School Athletics Championship wei da yoh ko leh yei naam U-14 Girls Best Athlete, da ong ko wa daw pyrchang u leh biang ya i jooh haka Meghalaya Games. Uwa yalehke lang waka ha ki chynrang, u Pyndap Makri, da ong u wa yooluti u wa ka District yong ki daw ye ko wow lehbha kamwa da ye ki haka School Athletics Championship, heiwa ka skur yong ki da yoh ki yei naam Overall Champion.
“Yooluti O leh wa daw em ka Meghalaya Games man ka snem kattu.” Da ong u Makri.
Kiwa da yooluti wow pynrem yaka Ri-Bhoi toh kiwa yalehke (Athletics) na West Jaiñtia Hills, u Ribet Dkhar wa u Dabit Dkhar, kiwa ong, “Sñiawskem hi i wei u e lut i waroh iwa ye i.”
Ha kani ka kynti ki jait yakob da boon ki wei ka 15 snem ka Azelia A Sangma, kawa da wan na Tura deilang wa kiwa yalehke lang waka da ong ko wa, “Sñiawkmen mynsien wei daw yaleh ko katwa ye ko haka yakhun Taekwondo.”
Neiliang won u All Meghalaya Karate-Do Association General Secretary u Ksan Kupar Warjri, da ong u wa kani man ko ka rynsan kawa biang bha ya ki karateka ka jylla wei da yooluti u wa daw yoh u yoo ya ki khloor wa thymme wow mih na kani ka lympung kam ki arngut wa pawnaam dooh ki karateka wa mih naka jylla, ka Linza Fenny Syiem wa u Damang Syngkon.
Heiyatoh won wa i pynkhreh ya kani ka lympung, da man ko kawa da biang wei neiliang ka Meghalaya State Olympic Association da kwah ko wow man kani ka lympung kawa sahkynmoo wei da khut leh ya waroh wow wan ki yow kyrchaan ya kiwa yalehke.
“Kwah O wow ban yei emkaam hajrong ki khynnah wa kamjooh ki paidbah yei emkaam ki wow mih u wan cha kani ka lympung yow pynyoo yei kyrchaan yong ki neibhah waroh em i i bhah, emkti i haka Meghalaya Games,” da ong u MSOA Vice-President u Ian Lyngdoh ynne ka sngi. “Kani ka lympung yalehke da pynman biang yaka hadien boon snem wei kyrmen i wa daw pynku ko yaka yalehke Sports kamjooh ka chait ka khiah.”
Da ong u leh wa kiwa yalehke ha kani ka lympung daw mihkhmat ki leh yaka Meghalaya haki snem wow wan.
“Kini ki jooh kiwa yalehke daw mihkhmat ki yaka jylla haka National Games ha u 2022 ka wow pynman hapoh Meghalaya hi wei daw yoh nong heidur ki takma deiwa pynkhreh yaki nadooh katni,” da ong u.
8 na ki 14 tylli ki jait yakob daw sdang ki mynstep wa kynthup yaka- Archery, Basketball, Boxing, Billiards & Snooker, Table Tennis, Taekwondo, Tennis wa Wushu. Yaka yalang wai pyrda namo ka Opening Ceremony daw pynman ha Jawaharlal Nehru Stadium heipor 11:00 waje i step. U kongsan toh u montri rangbah u Conrad K Sangma katwa u symbood kongsan won toh u Sports & Youth Affairs Minister u Banteidor Lyngdoh. Ka bai psiah ya ki paidbah man ko mynkna.
Discussion about this post