Jowai : Ka chnong Mootyrchiah hei ya krehlang wa ka Basin Development Unit, West Jaiñtia Hills da leh warom ki ya ka World Environment Day dei pynman ya i pynkhooid ya u loom Tiniang kamjooh leh u thung ya ki tre dieñ wa 5000 tylli ha kylleiñ ka chnong.
U loom Tiniang toh uwa da pyrchang ka chnong kattu da boon snem u pynbha pynmiat ya oo yow man u kam uwi na ki thaw wa riñ ya ki bru wa lai uiñke sawari na kylleiñ kylleiñ.
Uni u loom katkaam ki parom da ong wa nachwa jooh man u kam u loom thang ya ki Syiem kiwa da yap. Da thang ya ki ha uni u loom neidaw wa chynna ya oo na kylleiñ kylleiñ ki chnong hapoh ka hima yow tip ki wa da yap u syiem.
Na uni u loom ye u chynna palat ya ka wah Kupli wei da ong ki leh ye u chynna ya ki loom wa em cha ri-loom Khasi. I thmu katni toh yow pynman ya uni u loom kam i thaw wan sah miet (camping) ki bru yow yang ya ka sngi heipor wa mih ko hei step neibhah da kam ki tre chnong wa man i iwow sahkynmoo yanom rta.
Ha uni u loom leh em ka Park ya ki khynnah wa ki thaw baam doh hatre uni u loom. U loom toh uwa lait kari wa ye u lai hadooh ha khlieh u tangwa yow yada ya oo ym chah de ki tre chnong u ku ki kari.
Ya kiwa kwah u sah miet ha uni u loom emkaam ki u pyntip chwa cha u waheh chnong yow yoh u sah miet heini.
Ya uni u loom da chna pynmiat ya oo dei yarap poisa na ka tnat Forest wa ka ophis u BDO Laskeiñ.
Ha ka yalang wa pyllai da u ma W. Sungoh, MDC JHADC da emlang u J. Pohsngap, DFO (T) Jaiñtia Hills kam u kongsan wa u BDO ka Laskeiñ Block kiwa da pynsñiawthooh ya ki paidbah yei emkaam u pynneh pynsah ya ka rymaw.
Discussion about this post