Heiyatoh wa iwa pdung ha kawi ka krem mooyong hei step ka 5 tarik uni u bnai ha Mynsngat, Thangskoo wa dang haap hapoh ka Umpleng Police Outpost ka East Jaiñtia Hills District heiwa da dooh boon tylli ki mynsien bru.
Wei neiliang ka High Court ka Meghalaya leh ha ka hukum wa da pynmih ha ka 5 tarik hi da chimkhia ko yeini i kaam deiwa phah ya ki bor District wow leh ki yeiwa emkaam wei wow pynchitom ya waroh kiwa emkti heini i tih mooyong pyrchah aiñ.
Neiliang ka yung krehkaam u DC uwa man leh kam u District Magistrate da pyntip wa da yoh ki ujor kamjooh i pyntip na kiwa chong chnong wa lyngba ki Social Media wa ong wa i tih mooyong pyrchah aiñ wa kiwi ki mar pohkhyndaw ha kani ka thaaiñ Thangskoo daw pteiñ i deiwa em ki kattu katni kiwa daw pynthut ya kiwa pynkrehkaam ya ka aiñ yow khanglaad yei tympra ya ki kor, ki thaw sah, i tlep ya ki krem mooyong kamjooh i kem ya ki kari deilang kiwi de ki tiar ki tar.
Hajrong ini waroh da pynkrehkaam da ka Section 163 ka BNSS yow khang yei yalang palat 5 ngut ki bru ha kini ki thaw wa em ki krem tih mooyong pyrchah ya ka aiñ lait noh ki bru sorkar kiwa leh yei kaam yong ki.
Waroh ki Magistrate kiwa da phah wow leh yeini i kaam hap ki wow pait u sylli ya waroh ka thaaiñ Thangskoo wei u kem ki ya waroh ki kari, ki kor, ki tiar ki taar wa pynemkaam heini i tih mooyong pyrchah ya ka aiñ wei wow pynngat ya kitu kiwa emkti hapoh ki kyndon ka aiñ wa kynthup ya ka Mines and Minerals (Development and Regualtion) Act wa kiwi de ki Rules ko.
Ki Magistrate deiwa yarap ki pulit hap ki wow thooh wei kem ya ki tre ki paar mooyong, kiwa pynkrehkaam yow tih mooyong, kiwa yarap poisa deilang waroh kiwa emkti ha kini ki kaam pyrchah aiñ.
Da phah leh wow kem ya waroh ki sabut kam ki kot ki sla kiwa yatoh wa ini i kaam.
Kitu kiwa leh pyrchah ya kani ka hukum daw chah pynchitom ki katkam ki kyndon ka aiñ.
Discussion about this post