U Kamki Diengdoh uwa man kam uwa riñ dur namo u Director Photography wa u Editor haka phlim ‘Ka Chithi’ kawa dang lai chakhmat i pynyoo paidbah katni ha Auditorium, District Library Mynthong Jowai, hawa klam e mynsien ya kiwi won ki khon khynroo khyllood wa em sap hei riñ dur chna phlim da ong u kani ka kaam wym toh kawa suk wei hap maad boon i eh i khoo tangwa la man won kiwa chimkhia u pyrchang, daw yoh hi yei jop i sñiawhun hei kaam wa kreh.
Neitæ ya kitu kiwa em thong u chim kam kani ka laad ka luti kreh, kyntu u wym toh u dooh mynsien ki tangwa toh u pyrchang u lai bait chakhmat u pynpliah yei sap hanla sdang nei khian chwa leh kam i chna Vlog, Short Film, Music Video wa kiwi.
Wei wot kitu wa da pyndep i puræ hei kaam chna phlim leh ym mut mar ya dep da yoh khih yoh kreh næ yoh ki Project waphær waphær, deiwa e nongmuna u wat oo hi leh yoo u yow soh dang hadien.
Da pynkynmoo u ya oo hi leh wa kam uwa da embynta hei kam riñ dur chna phlim la 10 snem, nyngkong hi sdang u da ki Music Video ya kiwa boon kiwa tem wa rwai haka jylla Meghalaya wa cha baar kamjooh, neitæ won yoh u ki laad u chna ki jait phlim hapoh DDK Shillong neitæ ki Documentary wa kiwi.
Heiyatoh waki phlim won, ong u ‘Ka Chithi’ toh kawa nyngkong wa embynta u kam u Director of Photography, u Editor wa hadooh wow pynkhreh yaka Screenplay, wei ha oo hi chem u i yaphær hei chna phlim toh rap jynjar bha neibhah hap pynkhreh ha waroh ki liang wei iwa chim por bha leh em ki por da palat chi snem.
Heijooh i por leh kamwa da lai luti wow pynyoo paidbah ya kani ka phlim la kattu katni por, sñiawkmen wei hun mynsiem chooh chooh u wow sñiaw ya boon i yaroh i kyrchaan naki paidbah wa da wan pait.
Ya kani ka yaklam wa u Kamki ye phi u pait heini ha wah.
Discussion about this post