Jowai: Ki 3 tylli ki tnat sorkar wa pait ya ki kaam rep kaam riang, ka Krishi Vigyan Kendra (KVK), ka tnat Agriculture waka Horticulture da pynman ki ya ka yalang kynmoo warom ya ka World Soil Day wow pynchlur ya ki warep wow syndong ki ya ki khyndaw ha ki thaw rep yong ki.
Ka J.S. Sohliya, Research Officer, Jowai da ong ko wa khlem i khyndaw ym em wa ye u im ha pyrthai, neibhah ka khyndaw wa pynbiang baam ya waroh nadooh ki bru hadooh ki mrad tangwa nei leh u bru katni nadooh i tih ya ki mar pohkhyndaw, i pam dieñ wa kiwi da ktah joor ko yei bha i khyndaw.
Heijooh i por leh da ong ko wa kam ki warep leh lada e dawai bakla ya i khyndaw daw tynyap ko yei sboh i khyndaw wei toh u tip leh kam kiwon ki jait jhoor u thung ki wym baam yei sboh i khyndaw kiwa ye pathan u pynsboh ya i khyndaw.
U D. Lamar, Assistant Director Agriculture da ong u wa emkaam u “Rada” ya i khyndaw iwa mut kamwa syndong ya ki khon ki kti yong i emkaam u leh i jooh ya i khyndaw.
Da ong u leh wa cha i ya i khyndaw da booh i ki ha ki 3 jait ki kyrdan kitæ toh iwa bang, kthang wa iwa jaw (Acidic) wei boon ki por cha i i khyndaw toh iwa jaw wei hap e da ka umchuni yow pynwiar ya ini i jaw.
U Andrew Shullai, CEM JHADC kam u kongsan ha kani ka sngi da ong u wa i khyndaw toh iwa im wei ka stat sayan wa katni ye ko u yarap ya ki warep ha iwa boon i liang, kamtæ da kyntu u ya ki warep wow ap ki yei sneiñ ki sahep ki tnat sorkar ka wow yarap ya ki ha ka rep ka riang.
Ha kani ka sngi da saam leh ya ki Soil Health Card cha ki warep kiwa wa da dep e ya i khyndaw wa rep ki cha ki tnat sorkar, heiwa ha kini ki Soil Health Card da thoh yei rukom man i khyndaw wei da batai ya ki jait sboh wa ki jait jhoor wa ye ki u thung yow yoh nong ki chiboon.
Da pyntip wa ya kini ki Soil Health Card da dep saam da ki hajar tylli hapoh ri-loom Jaiñtia.
Discussion about this post