Shillong : Ka mem na Australia ka wa tip kam ka Samantha Gash ynnin da wan pynkut ko yei phet Ultra Marathon kawa jrong 3,000 Km iwa sdang ko nadooh na Jaisalmer, Rajasthan wei da pynkut ko yeini ha Shillong ynnin ka sngi.
Ya ini i phet da sdang nadooh ka 22 tarik u Naisaphar wei da lai lyngba ko 8 tylli ki jylla ha ki 12 tayaw.
Ha kani ka phet Ultra Marathon ki dhab na kylleiñ ki pyrthai leh da phet lang ki ha jar jiar i thaw wei da nujor wa ka Samantha hadooh katwon jngai dep phet ki.
Ka Samantha ong ko wa ini i phet yong ka hapoh India da yoh laad ko u yoo dei khmat yei rukom im ki paidbah wei man i iwa phær bha deiwa puræ cha ki kot ki sla wei u yoh u yoo dei khmat.
Ini i phet ka Samantha toh kam chibynta ka Run India Campaign yow pynmih poisa yow yarap ha i puræ puthi, i baam i dih, u pynbiang umdih, ki paikhana, i chah leh chilliang khmat ki kynthai wa kiwi kiwi de.
U Sony Varghese Thomas, Group Director ka World Vision India ong u wa ka Samantha da ye u pynmih poisa hadooh T. 70,86,000 wei ka leh ha ini i phet yong ka da psiah ko ha 18 tylli ki thaw wa ka World Vision pynemkaam ki ya kani ka poisa.
Ka Samantha leh da ong ko wa ini i psiah cha kini ki thaw toh kiwa ktah joor ya ka wei kiwa e mynsien ya ka heipor wa phet ko. Ki kynthai wa yachem ko ha Pauri wa ha Lucknow kiwa pynchlur ya kiwa chong chnong yow seiñ khih ki wow ye u kyrchaan kylliang kiwa katni da im ja ki na i kyrdan wa dooh hadooh i thaw sumaar ya ki manbei wa kjut kamjooh wa ki khon yong ki ha Alwar pynkynmoo ko ya ka wa dang boon iwa haap ko u leh.
Ka Samantha Gash nachwa man ko kam ka muktiar tangwa da ieh ko ya ini i kaam yong ka yow man ko kam ka bru kreh mon sñiawbha yow wanrah yei kylla ha ka imlang sahlang deiwa phet marathon, wei wow seiñ ya kiwa boon ki seiñ wow yarap ya ki paidbah.
Discussion about this post