Ynne i step, ar ngut ki koidi kiwa da li booh yow chah sumaar ha Jowai Civil Hospital, Ialong da yut ki na i thaw wa booh kset yaki ha kani ka thaw sumaar heipor kamwa 7:20 i step wei katkam wa man kattæ dang thooh ya ki da ki pulit.
Kini ki ar ngut kynthup ki ya u Small Phawa uwa na Riatsasim, Jowai wa u Kwal Laloo na Maskut, West Jaitñtia Hills kiwa.
Katkam ka yutip wa da yoh da ong wa u Kwal Laloo da chah kset u ha i kaam tynyap bru katwa u Small Phawa da chah kset u ha i kaam slaitbor wei da li booh yaki cha Hospital neidaw wa chitom ki heiwa ya uwi da li booh haka 27 tarik katwa ya uwi da li booh haka 29 tarik.
Neiliang ki bor pulit ka District da kyntu ki ya ki paidbah khamtam ya ki waheh chnong wow chemdien biang ya kini ki ar ngut. Yei daw wa lait kini ki ar ngut u yut dang pynman yaka takit.
Heijooh i por neiliang ki bor pulit da pyntip ki wa da ujor mukotduma biang pyrchah ya kini ki ar ngut heiyatoh wa ini iwa leh ki.
