Jowai: Ynne ka sngi uwi na kiwa chah kem ha ki pulit hei yatoh wa i tooh mobile u deilang wa ki ar ngut ki lok u, da yoh u wow yut na i kti ki pulit heipor wa dang li yah ki oo cha Civil Hospital, Ialong yow sylli ki doctor chwa wow yah ya ki ha khmat ka yungbichaar.
I tooh mobile da jia i na iwi i dukan wa em ha Ummulong ha u bnai wa da dep wei ha ka 10 tarik uni u bnai won ki pulit da kem ki ya u Shiningstar Pala (20 snem), u Skhem Pala (20 snem) wa uwi uwa dang hapoh 18 snem ya uwa da li booh cha Shillong Correction Home.
Ya ki 8 tylli ki phone wa tooh kini ki le ngut da chem biang ya ki wei da ksoh ki pulit ya ki 3 sngi yow pynman ya ka takit. Hadien wa kut kini ki le sngi, ynne ka sngi da kit ya u Shiningstar wa u Skhem cha Civil Hospital, Ialong yow pyndep ki doctor yei sylli yei chait i khiah yong ki chwa wow rah biang ki cha yung bichaar.
Da lai lang leh le ngut ki pulit da ka kari pulit wei da poi ki ha hospital heipor kamwa 9 waje i step. Ki pulit da yang slem ki ya ki doctor wei heipor 10:50 i step uwi u pulit da hiar u wow thooh doctor, uwi u pulit da hiar u wow lai mihlait wei da neh du uwi u pulit wa chong ha khmat ka kari. Heini i por u Shiningstar da ye u wow sai yei kti yong oo na u hatkari khlem tympiah ya u tala.
U pulit wa chong ha khmat ym em sñiaw u namo u yoo u yeini katwa u Skhem wa emlang hadien leh ym em yoo u yei lait u Shiningstar neidaw wa oo dang yoh thiah u.
Ki pulit da pyntip ki leh wa u Shiningstar da lai u cha yung u nyngkong wei neini da yut biang u dep u yachem wa kiwa ha yung u.
Hadooh wa pynmih ya kani ka khubor ym pu em chem ya u Shiningstar.
Discussion about this post