15 49.0138 8.38624 1 0 4000 1 https://wyrta.com 300 0

Dawa ka CoMSO na u Conrad wow pynche lada u pyn krehkaam namo ym pyn krehkaam ya ka ILP

0 Comments
Advertisement ad1

Shillong: Ka Confederation of Meghalaya Social Organizations (CoMSO) ka da dawa ko naka sorkar jylla wow khut ya ka yalang yong ki montri (Cabinet) wei kamjooh ya ka yalang yong ka sorkar synrop ka Meghalaya Democratic Alliance (MDA) wow pynche syndon la em ko i thmu næ ym em wow pynkrehkaam ya ka Inner Line Permit (ILP) ha ka jylla.

Yow pynjoor ya kani ka dawa ya ka ILP ha ka jylla, neiliang ki seiñgbhalang kiwa em ha ka chatri yong ka CoMSO, ynne da pynman ki da ka wah lama rong yong ha kylleiñ ki bynta ka jylla. Ha sor Shillong ya kani ka wah lama rong yong da sdang na Motphran kawa da lai cha Khyndailad deilang wa i seh ya ki lama ha tymbud luti wa kynthup leh ya ki kari yong ki paidbah.

Advertisement ad1

Hawa klam wa ki laad pathai khubor, u General Secretary ka Hynniewtrep Youth Council (HYC), u Roy Kupar Synrem da ong wa kwah wow tip che na ka sorkar deiwa paan leh wow yaklam ha ka yalang Cabinet wei kamjooh yong ka MDA.

“U Conrad Sangma toh u khut yalang u neibhah kwah i u tip kiwon wa kyrchaan wa kiwon wa kyntait ya ka ILP,” da ong u Synrem.

Da ong u leh wa ki seiñbhalang wei kamjooh ki paidbah kulmar ki neidaw wa u Conrad dang ha kini ki sngi ong u wa ka ILP man ko du kam ka atiar, katwa neiliang u symbood montri rangbah u Prestone Tynsong da ong u wa ka sorkar ka da pynkhreh ko wow wanrah ya ki kyndon kiwa kam ka ILP.

Uwa yahkhmat ka CoMSO da ong u wa ki seiñ ri-loom kiwa em ha ka sorkar toh u dawa ki na u Conrad wow khut ya ka yalang wow klam hajrong ka dawa yong ki seiñbhalang.

U Synrem da kylli u leh na ki seiñ ri-loom kiwa emlang waka sorkar deiwa ong, “Ki seiñ ri-loom ha ka por Election ki yalap ko wow jied ya ki neidaw wa ki em ki ka phang wow pynkrehkaam ki ya ka ILP. Ki toh u pynche ki katni ya ka yurim wa yeiñ ki hajrong ka ILP.”

Da ong u wa ka CoMSO ka pdiang ko lada ka sorkar pynpsiah ko ya ki kyndon ka ILP ha ki aiñ wow pait yei psiah i ki baar jylla wa kynthup ya ki soo tylli ki phang.

“Ki bru na baar jylla toh u pyntip ki cha ka sorkar hawa ki wan ki cha ka jylla wa hadooh katwon sngi sah ki wei toh u yoh ki u sah hapoh 179 sngi wei lada chem kiwa tyngkheiñ ya ki kyndon, ka sorkar toh u pynchitom ko ya ki,” da ong biang u Synrem.

Chooh chooh da ong u wa ka CoMSO ym em booh por ko ya ka sorkar, tangwa chong haka yalang wa rai hajrong kani yow e por ya ka sorkar wow pynkrehkaam ya ki kyndon ILP ha ka jylla, wei ha kani ka yalang daw chim leh ya ka rai ya ka yakhih wa khor.

Ha iwi tawon i liang, u President ka Hynniewtrep Achi’k National Movement (HANM), u Lamphrang Kharbani da ong u wa kani man ko i sdang wow pynsñiaw cha ka sorkar wa lada ym ap ko daw maad ya ki yakhih wa joor.

“Ym kwah i wow klam donhi da ki ktien wei ym chong ngiah lada ym em ya ki aiñ wow yada iwa sñiaw dooh kyrmen ya ka jaitbru yong i.” da ong chooh chooh u.

Also Read: Ym ngait ka KSU yei pynkylla ka sorkar yaka Residents Act, dawa wow pynkrehkaam da ka ILP

Also Read: Lyngba ka Ordinance dawa ka CoMSO wow pynkrehkaam ya ka ILP

Also Read: Ym du ka ILP wa ye wow yada yaka jaitbru: Conrad

0 Comments

Leave a Reply