15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Lyngba ka Ordinance dawa ka CoMSO wow pynkrehkaam ya ka ILP

0 Comments
Advertisement ad1
Advertisement ad1
Advertisement ad1

Shillong: Neiliang ka CoMSO (CoHSO wa ka AGHJAC) da pynche ko wa neiliang yong ka da dawa bait ko da ka Inner Line Permit (ILP) ha waroh kawi ka jylla Meghalaya wow kdoh u khoom wei wow chong chnong kiwa na baar hapoh jylla.

Nadooh wa sdang da dawa ko wa ka sorkar toh u pynkrehkaam ko ya ka aiñ Bengal Eastern Frontier Regulation Act (BEFRA), neiliang ka sorkar da pynche ko wa nadooh wa pyndam noh ya ka ri-loom Garo na kani ka aiñ da booh ko hei eh ya ka jylla neibhah kani ka aiñ mih ko na ka sorkar pyrdi ym na ka jylla, wow pynpsiah biang ya ka ri-loom Garo haap chna da ka Bill na Parliament ym na ka dorbar jylla wei da em leh ki seiñ wa kwah da ka Meghalaya Residential Safety and Security Act (MRSSA) wei wow booh noh ya ki Entry Exit Point.

Advertisement ad1

Neiliang ka CoMSO dei langær ong ko wa ka MRSSA kamwa man katni ym man ko kawa biang wei ymye ko leh wow yada ya ka jaitbru kamtæ da pynsñiaw wa emkaam bait da ka ILP, kamtæ wow yang ya ka Parliament wow pynchna ko ya ka BEFRA daw chimpor wei ymbien hi ki wow leh namo wow booh da ki Entry and Exit kamwa dawa kiwi ki seiñbhalang da emkaam won wow pynkhlan ya ka MRSSA 2016 wei wow pynkhlan ya ka emkaam wow thap noh ya ki kyndon ka BEFRA namo yong ka ILP ha ka MRSSA, khnang yow man ko kawa khlan.

Kitæ ki kyndon kynthup ki wa waroh ki baar jylla wa ki baar ri toh u paan bor ki chwa wow psiah wow sah ha ka jylla Meghalaya wei chwa wow ebor emkaam wow paan ya ki kot ki sla yong kitæ kiwa kwah.

Lada ebor ymtoh won wow palat ko ya ka 179 sngi wei lada psiah namo sah ki khlem yohbor toh u pynchitom ya ki deiwa kset patok namo deiwa daiñ kuna wei wow beh noh ya ki na ka jylla.

Ka bynta wow khang ya ki baar jylla wow thied thaw lada ki Tribal næ ki Non-tribal kawa em ha ka Section 7 yong ka BEFRA wei da em ka Meghalaya Land Transfer Act da miat wow khang noh ya ki Tribal baar jylla wow thied thaw deiwa pyndam noh ya ki na ka list ha ka ST Order 1950. Ini mut i wa ha jylla lait na ki Ynñiawtrep wa ki Garo ym kheiñ de ya ki kam ki Tribal wei yeini ye u leh neibhah wot ka Supreme Court leh da hukum ko wa kiwa wan na baar (Immigrant) ymye ki wow kam wa man ki ST namo SC namo OBC ha ka jylla wa poiwiar ki.

Ka CoMSO da ong ko leh wa em ka snem ah pyrtuid deiwa kdaw kiyi ki Illegal Resident, kiwon ki Temporary Resident wei kiwon ki Permanent Resident deiwa phah pynbait ya ka Notification kawa hajrong i e ya ka Permanent Resident Certificate.

Da dawa ko leh wa du ki tre jylla (Ynñiawtrep wa Garo) wa kitu kiwa poiwiar wa da sah hapoh jylla nadooh u snem 1971 toh u yoh ki ya ka PRC.

Chooh chooh da tyrwa wow pynkhlan ya ki Infiltration Check Gate ha ka jylla ymtoh wow em kitæ ki Facilitation Center wow yarap ya ki poiwiar wei da dawa wa chirup wa ka chnat pulit (Anti Infiltration Department) kawa yang ha ki khappood toh wow ebor ya ki dorbar chong wow Register næ booh yukheiñ ya ki poiwiar ha ki chnong, toh u em ka hukum wa ki poiwiar ymye ki wow chong chnong khlem yohbor na ka chnong, iwa mut wa hajrong ka ILP wa yoh na ka District Task Force toh wow yohbor sa na ka chnong lada u sah ki namo wa wan khih mylla ki.

Da ong ko leh wa lada ka sorkar ym pdiang ko ya kini ki phang wow thap hapoh ka MRSSA, ym pdiang ki ya itæ i pynkylla ya kani ka aiñ.

I daw wa emkaam ya ka Ordinance toh neidaw wa ka dorbar ka sorkar namo ka Assembly daw chong dorbar biang ko du ha u Naisaphra heiwa ha Assam daw pyndep ya ka NRC ha u Naiynru-Naiynñiaw wei lada ka BJP poi biang ko hei bor ha u Naisan ye biang ki wow wanrah ya ka CAB lyngba ka Ordinance. Lada ym khut da ka Special Session toh u pynkrehkaam ya ka ILP lyngba ka Ordinance ka wow kreh noh na u Naisaphra khnang wow yada ya ki jaitbru tre jylla hapoh i por wa biang.

Share this:
Previous

Da pynlait ya u khoo rachon hapoh WJH

Next

Rah ka Wahiajer waka Dulong ha ka lympung Under 12 Football Tournament yong ka Thadlaskeiñ Block