Jowai : Kam ka dak wow pynneh pynsah ya ka bei rymaw wow yrngam biang ki loom wa ki wah, ka Ryntihlang Cluster Level Federation (RCLF) Cham Cham, East Jaiñtia Hiils District, ryngkat wa ka Dorbar Chnong Cham Cham wa ka Meghalaya Basin Development Authority, Shillong wa 10 tylli ki skur hapoh ka chnong Cham Cham da wan yachim bynta lang ki heiwow lehwarom ya ka World Environment Day ha kani ka 6 tarik ha u Lum Moosata.
Ha katai ka sngi da thung hadooh 10 hajar tylli ki tre dieñ wa 200 tre ki syntu ha waroh ki bynta u Loom Moosata ka wa man ka thaw yong ka dorbar chnong Cham Cham. Ka Ryntihlang CLF wa ka chnong Cham Cham daw pynboon chooh chooh ki ya ki tre dieñ wa ki syntu ha u snem wow wan.
Ya kani leh warom da sdang nadooh ka 3 tarik wei u kut ko hadooh ka ni ka 6 tarik uni bnai. Ha ki ni ki sngi da pynman ya ki programme waphær waphær kam wow pynkhooid chnong, i drawing, thoh sur-rwai, wa kiwi kiwi wada chimbynta daki khynnah skur waphær waphær ka chnong.
Ha ka sngi khaddooh da em ka yalang ka wa da pyllai da u waheh chnong ka Cham Cham u ma Stop Phawa, ha ka wa u Dr. Thomas Iangjuh, Scientist Orchid da man u kam u kongsan.
U Dr. Thomas ha wa klam da ong u wa i thung ya ki dieñ ki siej ha ki loom ki bru daw yoh myntoi bha ki ym du kat ka la’ær kawa khooid tangwa chisien ka sngi ka ni ka thaw daw kylla ko kam ka Tourist Spot ka wow riñ ya kiwa uiñ ke pyrthai
Ha ka ni ka sngi da yoh leh yei klam na ka kong Iona Dkhar, President CLF, u ma Karlo Dkhar, Secretary ka chnong, u ma Mul Phawa, dkhot ka chnong Cham Cham, u ma Bilat Phawa wa kiwi kiwi.
Discussion about this post