I kem poisa ki pulit ka Meghalaya ynnin u snem toh iwa boon dooh ha ki 50 snem wa da lai deiwa yoh u kem Rs. 45.6 lak.
Yeini da pyntip da u Director General of Police, u Dr. LR Bishnoi hawa yaklam wa kiwa thoh khubor ynnin ka sngi ha Shillong.
Da khana u wa ha u snem 2022 da yoh wow kem Rs. 36 lak tangwa ha u snem 2023 da yoh u kem Rs. 45.6 lak wei ha uni u snem 2024 da yoh u kem Rs. 60,000 ka poisa ha ki ar bnai wa da lai.
I kem drugs leh toh iwa boon dooh ha kini ki ar snem wei da yoh leh wow kem kiwa boon dooh ki kynthai wa dai drugs.
Ha 2022, ki pulit da Register ki 116 tylli ki Case, katwa ha u 2023 da ku cha 189 tylli wei ha ki ar bnai uni u snem da em 13 tylli ki Case.
Ki bru wa chah kem ha u 2022 da em 234 ngut, ha u 2023 da em 355 ngut wa 25 ngut ha ki ar bnai uni u snem.
U DGP da pyntip u leh wa nadooh wa wan kreh u hapoh ka jylla, da em 610 ngut kiwa dai drugs wa da chah kem wei na kini 61 ngut toh ki kynthai iwa da man 10%.
Da khana u leh wa da yoh u kem 7.5 kg i Heroin ha u 2022, neitæ 16.3 kg ha u 2023 wei da jan dap chi kilo ha ki ar bnai uni u snem. Waroh da yoh awjan 26 kg.
Heiyatoh won wa u bhang, da yoh kem 3987 kg ha u 2022, da jan dap 1400 kg ha u 2023 tangwa ha kini ki ar bnai u 2024 da yoh kem 4750 kg.
Da yoh leh wow kem ya ki Yaba Tablet kiwa da chna ha Myanmar iwa wan lyngba ka Bangladesh chapoh ka thaaiñ North East India.
Ha u snem 2022 da yoh wow kem 19,000 kini ki Yaba Tablet hapoh ka jylla wei da ku cha 60,000 tylli ha u snem 2023. Ha uni u snem da yoh wow kem kamwa 2000 tylli ha ki ar bnai wa da lai.
Da em leh kiwi ki jait dawai Psychotropic Tablet wa dai cha kiwa dih drugs wei kini da yoh u kem 16,928 tylli ha u snem 2022 wa 32,298 tylli ha u snem 2023 neitæ 600 tylli ha u 2024.
U DGP da pyntip u leh wa ynnin u snem hei sien wa nyngkong da yoh wow kem Crystal Meth iwa khia Rs. 14.2 kg wei ini i jait drugs toh iwa sy’at bha wei iwa chongdor hadooh Rs. 1.5 klur chi kilo da ong u DGP.
I dawi ky’oh wa da yoh u kem toh 28,000 tylli ki klong ha u 2022, neitæ 88,000 klong ha u 2023 wa 112 klong ha kini ki ar bnai.
Ki Mobile Phone wa yoh kem toh 137 tylli ha u 2022, ha u 2023 won 408 tylli wei ha uni u snem won 30 tylli.
Ki kari wa da yoh kem ha u 2022 da em ki 67 tylli, iwa da ku cha 157 tylli ha u 2023 katwa ha uni u snem won 12 tylli.
Waroh ki drugs wa da yoh kem toh kiwa chongdor Rs. 75 klur ha u 2022. Ini da ku i cha Rs. 170 klur ha u 2023, wei ha uni u snem du ha ki ar bnai da yoh Rs. 21 klur. Iwa da jan poi 300 klur ha ki ar snem.
Discussion about this post