Ki pulit ka Anti-Narcotics Task Force (ANTF) ka East Khasi Hills deiwa wa ki pulit ka Lumdiengjri Police Station da yoh ki wow kem ya 5 ngut kiwa suba dai drugs kiwa kynthup ya 3 ngut ki chynrang wa 2 ngut ki kynthai ha ka 9 tarik uni u bnai na Lower Mawprem.
Nyngkong hei sngi, ki ANTF da yoh ki wow kem uwi u bru najan ka yung krehkaam ka KHADC wei na uni da yoh wow kem 5 tylli ki khieh sabon wa em i Heroin hapoh wa khia 66.46 gm, ar tylli ki Mobile Phone wa kawi ka kari wa pynemkaam u.
Hei janmiet won hadien wa da tip chooh chooh wa dang em kiwa dai drugs ha thaaiñ Lower Mawprem hi, da yoh wow kem sa 4 ngut heiwa na kini da yoh wow kem 20 tylli ki khieh sabon wa 20 tylli ki tadong khian kiwa em Heroin 268.71 gms.
Da yoh leh wow kem ya 7 tylli ki Mobile Phone, ka poisa wa T. 6,87,150 neitæ 60 tylli ki thyrnia wa 25 tylli ki tadong khian wa thylli.
Neiliang ki pulit dang pynman ki ya ka takit yow chem ya kiwa emkti pynpoi ya ini i drugs.
