Shillong: Ka BJP kawa khlem pynyakhun kyrtong MDC ha ka Election wa da dep, tangwa katni da pynkhreh ko wow pynbaptis boon ngut ki MDC hadien ka Election.
Kham nachwa uwa yahkhmat ka BJP Meghalaya uwa man leh u montri ha ka sorkar, u Alexander Laloo Hek da kam u wa ka BJP daw pynbaptis ko ya ki MDC kiwa jop wa kwah wow psiah cha ka Party, wei ini da ye ko u mankaam neidaw hadooh 10 ngut ki MDC na JHADC daw chah pynbaptis ki ha kini ki sngi wow wan.
Hawa yaklam wa u Hek ynne ka sngi da pyntip u wa 8 ngut ki MDC ka Jaintia Hills ki da pynbna ki wow psiah noh cha ka BJP, da em sa 2 ngut kiwa dang wan pynyabi cha ka Party wei ha kani ka yaklam wa u AL Hek, 10 ngut ki MDC na JHADC ki da dep ki wow pyntikna wow psiah cha ka BJP kiwa kynthup na Congress, UDP wa naka NPP leh.
“Nalor kini ki 8 ngut, sa ar ngut ki wym pu kwah pynmih pyrtuid kiwa da dep wow yaklam wow psiah noh cha ka BJP wei kamwa man katni em 10 ngut ki MDC ki wow psiah cha ka BJP na JHADC,” da ong u.
Chooh chooh u Hek da pyntip u wa ym du ki MDC na JHADC ki wow psiah cha ka Party, tangwa dang em chooh chooh sa ar ngut na GHADC wa uwi u MDC na KHADC, kini leh ki wym pu kwah wow pynmih pyrtuid wa ki da psiah ki ha ka jooh ka sngi cha ka Party.
Ha i yong sakhiat ka BJP da pynbait ko wow pdiang burom ya kini ki MDC mynstep ka sngi ha yung krehkaam ha Shillong, tangwa neidaw wa ym lait u Himanta Biswa uwa man uwa yahkhmat ka BJP kamjooh u montri ha ka sorkar Assam, da pynkynriah noh cha ka sngi Choh-that wow wan, ha kawa da pynbait leh wa ha kani ka yalang pdiang burom daw emlang leh uwa e ktien ka BJP, u Nalin Kohli.
Ki 8 ngut ki MDC na JHADC kiwa da mih pyrtuid wow psiah cha ka BJP toh u Lakhon Biam (UDP), Krison Langstang (UDP), Treilang Suchiang (UDP), Dawan Lyngdoh (UDP), A. Andrew Shullai (INC), Arbor Hima Darnei (INC), Holando Lamin (INC) wa u Aiborlang Shadap (INC).
Ha i jooh i por uwa yahkhmat ka BJP ha Meghalaya da ong u leh wa ka Party da yaklam ko leh wa ki kattu katni ngut ki MLA naka Congress kiwa pynsñiaw yei kwah u psiah cha ka Party, tangwa da kyntait u wow pyntip ya ki pyrtuid yong kini ki MLA.
“Kham nachwa i da yaklam i wa 5 ngut ki MLA ka Congress, katni da em chooh chooh sa 3-4 ngut ki MLA na kani ka jooh ka Party kiwa da pynsñiaw wa em yumut wow psiah noh cha ka BJP,” da ong u Hek.
Discussion about this post