Ka yung bichaar u Special Judge (POCSO), North Garo Hills District da rai pynrem ya u Jaseng D. Shira uwa na chnong Nameram deiwa phah kset ya oo 10 snem deiwa khor bha wei wow su ka kuna wa T. 2000 ha ka hukum wa da pynmih ha ka 21-10-22.
Ini toh heiyatoh wa ka ujor ha ka 31-07-18 da ki waheh ka chnong Nameram kawa dang haap hapoh ka Kharkutta Police Station wa da ksoh ka chnong ya u Jaseng hadien wa slaitbor u ya ka khon nah u kawa dang 10 snem heiwa da ujor FIR leh da ka kurim u heiyatoh wa ini wa jia heiwa yeini i kaam da leh u Jaseng ha ka 30-07-18 heipor 10:00 waje i miet.
Ya ka takit da pyndep da ka WP/SI B.N. Sangma wei da rah cha ka yung bichaar ha ka 21-08-19 da ka Kharkutta Police Station, North Garo Hills.
Ha North Garo Hills biang, ka yung bichaar Special Judge (POCSO) da rai pynrem deiwa phah kset ya u Tapan Rai uwa na ka chnong Tillapara 18 bnai deilang waka kuna kawa T. 2000 hadien wa thmu u wow slaitbor pyn ya ka khon yong oo hi kawa dang 10 snem.
Ini toh iwa da jia ha ka 25-05-16 heipor kamwa 2:00 waje i sngi heiwa u Tapan Rai da pyrchang u wow slaitbor pyn ya ka khon u kawa dang 10 snem pyn hei yung wa sah ki tangwa kani ka khynnah da yoh ko wow yut neidaw wa psiah ka payu waheh ko ha ini wot i por heiwa ka takit da chem leh wa da pyrchang uni u manpa wow leh yeini i jooh ha ki por wa nachwa.
Ya ini i kaam da rah hakhmat ka yung bichaar ha ka 23-02-17 wei da pynmih ya ka hukum pynrem ha ka 20-10-22.
Ha West Garo Hills won, ka yung bichaar u District & Session Judge da phah kset ya u Nenggrik D Sangma 11 snem deilang ka kuna wa T. 70,000 hadien wa da chem wa slaitbor u ya kawi ka khynnah skur ha ka hukum wa da pynmih ha uni u bnai.
Ini toh iwa da jia ha ka 02-06-17 heiwa u Nenggrik da slaitbor u ya ka khynnah skur heipor wa liwan yung ko wei ya ka takit da leh da ka WP/UBSI Salmay R. Marak wei da lai rah hakhmat ka yung bichaar ha ka 01-05-18.
Ha ka jooh hi ka District, ka yung bichaar u Special Judge (POCSO), West Garo Hills da rai pynrem ya u Lukias G Momin deiwa phah kset ya oo 6 bnai deiwa khor bha deilang waka kuna kawa T. 60,000 wei lada ym su ya kani ka kuna daw hap chong patok u sa 6 bnai.
Ini toh heiyatoh iwa jia ha ka 18-02-16 heiwa da yoh ujor ha ka Tura Women Police Station wa uni u bru da tba da jrong kti khlem akor u ya kawi ka khynnah kynthai. Ya ka takit da pynman da ka WP/UBI G.T. Sangma heiwa da rah hakhmat ka yung bichaar ha ka 26-07-16.
Ha West Garo Hills hi, ka yung bichaar u Special Judge (POCSO) da phah kset ya u Arindom Das chi snem chiteiñ deilang waka kuna kawa T. 20,000 wa jrong kti wei tba khlem akor u ya kawi ka khynnah iwa da jia ha ka 16-05-16.
Sa iwi i jia ha West Garo Hills biang, ka yung bichaar u Addl. District & Session Judge da phah kset u chi rta ya u Tengsal D. Sangma deilang waka kuna kawa T. 1 lak.
Ini toh wa iwa jia ha ka 29-03-12 heiwa u Tengsal da dat da bom u ya ka Pringchi D. Sangma, ya u kurim ko u (L) Persist Ch. Sangma wa u payu u kurim ko, u Najib Sangma heiwa heipor wa u kurim ko dang yaleh u wow yada ya ka, u Tengsal da dung u ya u kurim ko ha rupai hadooh wa yap u kat wow ye u kit oo cha Hospital.
Ya ka takit da pyndep da u UBSI Bishnu Thapa wei da rah hakhmat ka yung bichaar ha ka 05-06-12 kawa da pynmih ya ka hukum pynrem ha uni u bnai.
