Ka chnat pulit ka jylla Meghalaya ha ka sien kawa nyngkong da pynman ko ya ka yalang kawa e mynsien deiwa e kti ya ki chithi thung kreh cha ki pulit kiwa psiah kreh thymme ha ka yalang wa man ha Shillong International Centre for Performing Arts and Culture.
Ha kani ka sngi emlang leh u Montri Rangbah ka jylla, u Conrad K. Sangma, u Symbood Montri Rangbah, u P. Tynsong, u Dr. L.R. Bishnoi, Director General of Police, u D.P. Wahlang, Chief Secretary, u F.G. Kharshiing, IPS, ka M.G.T. Sangma wa kiwi kiwi.
Hawa e i klam kam u kongsan ha ka yalang, u Conrad da yaroh u yei kreh ka Central Recruitment Board neibynta wow jied ya ki 1010 ngut kam ki dkhot kiwa thymme cha ka chnat pulit na napyrdi ki 1.5 lak kiwa yakhun wow yoh ya ini i kreh wei da pynsñiaw u leh yei sñiaw skem wa kini ki dkhot wa thymm u e ki yei chakri wa paka tam neibynta ka chnat pulit.
Na kini ki khynroo khyllood wa psiah kreh thymme kam ka Ibapalei Syiemlieh, u Ferdinand Chyrmang, ka Jessica Kharbuki waka Meghna D Sangma da yoh pdiang ki ya ki chithi psiah kreh lyngba u Conrad ha ryngkat i emlang ki sahep sorkar wa kiwa ha-yung kini ki pulit.
U Conrad da pynsñiaw u leh ya i mynsien raikut wow pynkhlan heiyatoh wa i kreh yong ki kam kiwa kreh pulit wa thymme.
Chooh chooh da ong u wa ka sorkar jylla da chynna ko hajrong i emkaam wow pynbiang yeiwa emkaam wow yakhun ya ki kaam pyrchah aiñ wei wow wanrah ya i chongsuk chongsaiñ kamtæ neiliang ka sorkar da chim rai ko wow pynkhlan ya ka chnat pulit ha ka jylla, iwa kynthup wow jied ya u Commissioner hapoh ka District wei wow pynpsiah kreh chooh sa kamwa 2000 ngut ha ka chnat pulit.
Da khana u wa daw pyndap pynbiang yeiwa emkaam ki bor pulit katkam ka juk wa katni, wei neiliang ka sorkar da chim ko yaka rai wow thied ya ki kari wow lai uiñ sonteri da kiwa thymme neibynta ki Police Station wa ki Outpost waphær waphær wow kynthup nadoh ki thuk-thuk khnnag wow pynkrehkaam smat heipor wa jhan.
Da pyntip u leh wa da phyllu yumut ki leh neibynta ka Engineering Wing hapoh ka cnat pulit, heiwa u Superintendent of Police (SP) u man u kam u Chairman wei kani daw pait ko yei tei yei chna ya ki thaw krehkaam ki pulit wei daw wanrah leh ya ka Directorate of Forensics khnang wow pynkhlan chooh chooh yei ye ki pulit wow krehkaam.
Neiliang u Dr. L. R. Bishnoi, Director General of Police da ong u wa waroh kini ki dkhot kiwa da emlang ha kani ka sngi da pyndep ki ya waroh ki bynta kiwa yatoh wa ki kyndon psiah kreh kiwa chitom bha u jop yow chah jied wei kiwa chah jied toh hajrong ka yurim wa de ye ki wow pyndep yeini waroh na waroh ki 12 tylli ki District ka jylla. Da kyrmen skem u wa i kreh chitom yong ki u man ko i kyrkhu wa khroo neibynta wow pynneh pynsah ya i chongsuk ha ka jylla.
Discussion about this post