11 tarik u deiñ lama yong ki 3 seiñ wow pyrchah ya ka CAB

Shillong: Ki le tylli ki seiñbhalang wa kynthup ya ka FKJGP, HNYF wa ka RBYF da rai ki wow deiñ lama yong ha ka 11 tarik uni u bnai wow pyrchah joor yei mynjur ka Lok Sabha ya ka Citizenship Amendment Bill 2016.

Ya ini i deiñ lama u pynman nadooh 9:00 waje i step hadooh 3:00 waje heiwa daw thang leh ya ki dur ka BJP wei ya i thaw daw pynbna won hadien.

Hawa pynbna yeini, u President ka FKJGP u Wilbirth Rani da ong u wa kini ki le seiñ pyrchah joor ki ya kani ka Bill kawa da pdiang wei mynjur da ka Lok Sabha wa yakhmat da ka sorkar BJP neibhah wa ka thmu ko wow pynman ya ka ri India ha i pyrtuid ka niam.

Da ong u wa ha u snem wa dadep, ki seniñbhalang waphær waphær ha kani ka thaaiñ mihsngi hapoh ka lama ka North East Indigenous People Forum, da dep chong kyllaiñ myngor hakhmat ka yung krehkaam u Lat ka Assam wow dawa pynsangeh ya kani ka Bill.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Ha kani ka North East Indigenous People Forum kawa em kamwa 11 tylli ki seiñbhalang na kani ka thaaiñ mihsngi wa yahkhmat da u Anup Chetia kam u khlieh yong ka.

U Willbirt da ong u wa ka BJP da leh ko yeini da i buitpoh wow pynmam ya ka ri ha i pyrtuid ka niam, kawa man pyrchah ya ka riti synchaar paidbah yong ka ri.

Da ong u wa lada ka sorkar pyrdi ym ap ko yei pyrchah ki paidbah ka thaaiñ mihsngi wei u mynjur bait ko ya kani ka aiñ, daw chonglang ki chirup wow pyrkhat yeini.

Da ong u wow pynkhlan yei yakhih, daw chna ki da ka North East Indigenous People Forum yong ka Meghalaya Chapter.

Katwa u President ka RBYF u Bipul Thangkhiew da beiñ joor u ya ka sorkar jylla kawa pynslem wow pyndep ya ki thaw mih wow psiah kamwa da mynjur.

Da ong u wa i e daw ka sorkar wa haap lai katkam ka Land Acquisition Act 2013 wow chim thaw wow chna ya ki thaw psiah thaw mih, man i iwa phylla neibhah ya ki thaw wow booh karkhana næ ka Industrial Estate ha Umsning da ka MIDC, ym em lai katkam kani ka aiñ.

Lada ye ko wow thied bait khlem lai katkam kani ka aiñ ya ki ktem karkhana, weileh won wym ye wow leh ya ki thaw wow chna ya ki thaw psiah thaw mih? Da kylli u Bipul.