U Montri Rangbah ka jylla, u Conrad Kongal Sangma da ong u wa ka jylla daw yoh ko 11 tylli ki Ambulance wa em ki tiar sumaar ya kiwa da yoh na ka chnat DoNER ka sorkar pyrdi, deiwa pynrap leh wa heipor wa sdang biang ka khlam da pyrkhat kammon wow kit ya ki bru cha ki thaw sumaar neibhah ym pu boon ware kiwa chitom joor, wei heitu i por ym johkhe wow emkaam ya ki Ambulance wa biang ya ki tiar sumaar.
Da pyntip u wa i dor kini ki Ambulance man ki kamwa T. 25 lak kawi deiwa pynrap leh wa i man i long yong i wan kani ka khlam da man i kam ha ka thma wei ymtoh iwa suk wow pynbiang lut liang wanang.
Chooh chooh da ong u wa kamwa man katni ka sorkar hap kreh ko yeiwa bha tam deiwa pdiang leh wa dang boon bha i duna wei emkaam wow pynmiat ya ki, da ong u leh wa wot hapyrdi i eh i khoo ka chnat i chait i khiah da yaleh ko wow kreh bha heiwa da ye wow wanrah ya ki Oxygen hadooh 3000 tadong neiwa jooh em du 700 tadong, da pynrap u leh deiwa ong wa ya ki Oxygen Plant da pynkhreh ha kamwa 12 tylli ki thaw sumaar wei yeini da ye wow leh du hapoh i por wa tbian.
U Conrad da kyntu u leh ya kiwa mihkhmat paidbah wow lai pait lai sylli ya ki thaw sumaar wow tip yeiwa sakhiat hadooh katwon chem chitom kiwa kreh ha ka chnat i chait i khiah hei yakhun pyrchah ya kani ka thma.
Heiyatoh wa i em poisa ka jylla, u Conrad da kdaw u wa ka jylla dang emkaam ko chiboon wei hanla kattæ leh da pyntikna ko wa lai bait i kaam.
