U Symbood Montri Rangbah ka jylla uwa pait ya ka chnat Kaam Pohyung (Police), u Prestone Tynsong da ong u wa i klam pyrchah ri (Anti National) da u Simon Shylla ha rynsan Facebook daw ktah ko ym du ya ka jylla Meghalaya tangwa ya waroh kawi ka ri neibhah wa toh i klam pyrchah ya ka ri India.
Da ong u wa i chim kaam noh wut-wut da ki pulit toh yow lait u chlur u leh ya kiwon kiwon ki kaam pyrchah aiñ kiwa ye u ktah yei chngaaiñ kiwa chong chnong ka jylla wa kamjooh yong ka ri India.
Neiliang u Symbood Montri Rangbah da kyntu u ya waroh kiwa chong chnong wow yieñ yatylli lang wei ymtoh wow e laad wow em biang i klam kynthah pyrchah ya ka ri.
Kam wow pynkynmoo wa ki pulit da kem ki ya u Simon Shylla hajrong iwa thoh Comment u da ki kyntien pyrchah ri ha Facebook Page kawi ka laad pathai khubor heiyatoh wa iwa jia ha Pahalgam, Jammu & Kashmir.
Uni u bru uwa chah kem da pynemkaam u dei pyrtuid ‘Man Shylla’ ha ka Facebook, wei i pyrtuid tre u toh Simon Shylla (30 snem) uwa na Umlyngka.
Ki pulit da pyntip ki iwa thoh uni u bru toh deiwa kyntu ya ki bru kieñ suloi wow hiar thma ya ki bru ha kani ka thaaiñ chaneiñ mihsngi ka India, iwa da wanrah yei sñiaw yaphær wei da ktah ko yei man kam kawi ka ri.
Ki pulit da khyrrup ki ya ar tylli ki Mobile Phone na uni u bru wei da pynngat mukotduma ha Lumdiengjri PS. Wei ka Kasari da pynmih hukum ko wow kset ya oo 14 sngi ha Judicial Custody.
Discussion about this post