Kam chibynta ka Teachers’ Day, u Prime Minister ka ri, u Narendra Modi da pynbna u ya ka thong krehkaam wa thymme kawa tip kam ka PM SHRI Schools (PM Schools for Rising India). Kani man ko ka Scheme ka sorkar pyrdi kawa daw kyrchaan poisa pura da ka sorkar pyrdi yow pynchna pynmiat ya 14,500 tylli ki skur deiwa jied ya ki skur kiwa da em chwa kiwa pynlai da ka sorkar pyrdi, ki sorkar jylla wa kiwi de.
Ka PM SHRI Schools toh kam chibynta wow pynyoo yei rukom krehkaam ka National Education Policy 2020 wei wow man kam ki skur ki wow yahkhmat ya kiwi ki skur wa em cha jan wow bood ki. I thong toh ym du wow e sikai da iwa biang tangwa yow pynkup bor ya ki khynnah ha waroh ki liang katkam iwa emkaam ka juk wa katni.
I rukom hikai hapoh kini ki skur toh yow yoh ya ka yurim wa skem nadooh wa dang khian deiwa pynchlur wow jied ya iwa kwah ki khynnah, yow chem yei sap yong ki wei heijooh i por leh wow man ka lai skur kawa muja.
Kini ki skur daw em ki leh ya ki Lab, ki Smart Classroom, Library, ki tiar yalehke Sport, Art Room wa kiwi kiwi wa yoh u pynemkaam da waroh. Daw sikai leh ha kini ki skur kammon wow pynlang um, u leh Recycling yei jhep, ym toh wow pynsepai yei bordiñ wei wow im deiwa pyrkhat ya ka pyrthai waroh kawi.
Da booh thong wa kini ki skur daw yahkhmat ki leh wow e yei sikai wa bha iwa neibynta waroh khlem da leh chiliang wei deiwa pyrkhat leh ya ki ktien ki thylliej wa i bor ki khynnah yow chimbynta ki katkam wa yahaap wa ki katkam wa da booh hapoh ka NEP 2020.
