Ka Khasi Students’ Union-Laban Circle ynne ka sngi da lai booh dorkhat ko ha ka Deputy Commissioner ka East Khasi Hills wei da e por 15 sngi yow khyndang noh ya ki bru wa sah pyrchah aiñ ha Maxwelton Estate iwa heh kamwa 9 Acre iwa dang haap hapoh ka Dorbar Chnong Kenches Trace, Oxford, Rilbong (K.O.R), Shillong.
Ini i kaam toh iwa da sahkut ha ka miej ka DC nadooh u snem 2022 hadien wa da dep ujor wei khlem da pynbait da ka sorkar kamjooh da ka yung krehkaam ka Deputy Commissioner yow beh ya kini ki bru kiwa kat dang lai i por dang boon ki kiwa wan na baar jylla.
Ka seiñ da ong ko wa kini ki bru da sah ki pyrchah yaka aiñ ha ini i thaw wa dang haap hapoh ka Municipal wei da ri masi, da pynkai ki yei jakhlia cha ki ki nala ki wah iwa da ktah lut yei chait i khiah yong ka chnong ka thaw.
Katkam ka aiñ, ki thaw wa em hapoh ka Municipal ym chah wow ri mrad tangwa ki bor wa toh u pait yeini da leh thlah ki.
Neiliang ka seiñ da dep ko leh wow yachem waka Shillong Municipal haka 06-06-23 deiwa booh lang waka dorkhat heiwa ka Municipal da mynjur ko ha itu i por wow phah Notice cha kini ki bru tangwa da kut du hei daiñkuna wei da ong ka Municipal wym ye ki u beh ya kini ki bru.
Ka seiñ da kdaw ko leh wa kini ki bru da yoh bordiñ, da yoh um ki khlem da su iyi iyi wei da sñiaw leh wa ya kini ki bru da kyrchaan poisa da ki bru chitniam Hindu wei kani ka thaw da man ko leh kam ka thaw dai drugs, i leh ya ki kaam dakait, i thaw rieh kiwa tooh iwa da booh hei maa ya kiwa chong chnong.
Ini i thaw em i leh hajan ka thaw wa pynman yaka dorbar sorkar tangwa kiwa mihkhmat da leh thlah ki yeini.
Kamtæ ka seiñ da ong ko wa ini toh i yachem wa khaddooh wei lada ym leh ki bor wa toh u pait yeini iyi iyi hapoh 15 sngi, ka seiñ daw chim ko da ki yong ka hi ki luti.
Discussion about this post