Shillong: Ka Public Undertaking Committee da chem ko wa hadooh 17 Tylli ki Company Sorkar ha ka jylla toh ki wym ye u krehkaam wei ka sorkar hap su ko wow psa ya ki hadooh wa da dooh nong T. 389 Klur.
Kani ka Committee yong ka yung dorbar chna aiñ wa da khlieh da u Salseng C Marak, da khut hajir ko ya ki sahep yong kini ki Company wei da chah beiñ ki yei wym ye ki u e ya ka chakri kamwa toh u leh ki.
Katkam wa pyntip u dkhot ka Committee, u Titosterwell Chyne, na kini ki 17 tylli ki Company, 15 tylli toh kiwa krehkaam kam kiwa swe wa kjut wei ar tylli won toh kiwa ym em de krehkaam wei sah sa da i pyrtuid donhi.
Ki ar tylli kiwa da yap toh ka Bamboo Chip Ltd wa ka Meghalaya Watch Ltd.
Kiwi kiwa dang em tangwa ki wym krehkaam bha de toh ka Meghalaya Govt. Construction Corporation, Mawmluh Cherra Cement Ltd, Meghalaya Transports Corporation, Meghalaya Tourism Development Corporation, Meghalaya Forest Development Corporation, MeECL wa kiwi.
U Chyne da ong u wa ka Committee da dep phah ko cha ka sorkar yow pynbait wow pyntikan ki wow krehkaam ki yow lait na ka doohnong tangwa ym em leh ko iyi iyi leh, kamtæ ka Committee da khut biang yow yoh yei pynche.
Da pyntip u leh wa ka Committee da chem ko ya kini ki Company kiwa baam hati kit kule naka kaiphod yong u Controller and Accountant General yong u snem 2016.
Da pyntip u leh wa ka Committee da khut ko ya u Chief Secretary tangwa ym em wan u.
Katkam i ong u Chyne, ka sorkar da toh u khang noh ko ya ki tu ki Company ki wym ye u pynmihnong neibhah daw ktah bha ko ya ka sorkar jylla wow su tulop khlem em iyi iyi i mih na ki.
Discussion about this post