Ha Meghalaya ynne ka 15 tarik da em sa 3 ngut kiwa yap na u COVID-19, kiwa dang yoh thymme da em ki 173 ngut wa 64 ngut kiwa dang chait.
Wa kini kiwa dang yap, waroh kiwa yap da poi ki 73 ngut, kiwa dang em ya uni u khñiang da em ki 2445 ngut wa kiwa da chait da em ki 5646 ngut.
U Director of Health Services (MI), u Dr. Aman War da pyntip u wa kini kiwa dang yap toh ka Jubita Thabah (65 snem) kawa na Lum Dorbar, Upper Lumparing. Wei kani toh kawa li booh cha NEIGRIHMS haka 27 tarik u Naikhynde. Nyngkong da Test daka RT-PCR wei da chem toh kawa ym em yoh ya uni u khñiang tangwa da yabi ko na uwa yoh ya uni u khñiang wei da chem ya ini hadien wa Test haka 4 tarik uni u bnai wei da khlaad noh ko haka 13 tarik uni u bnai heipor 10 waje i miet.
I daw wa yap toh naka Type I Respiratory Failure, ka Sepsis wa ka COVID -19 pneumonia. Kani leh toh kawa chitom na Hypothyroidism, Anemia wa Chronic Liver Disease.
Da pyntip u leh wa u Sagar Barua (82 snem) na Thana Road wa chitom leh naka Diabetes deilang wa i iñdoh tangwa da khlaad noh chwa wow poi cha ka Nazareth Hospital haka 14 tarik uni u bnai nadooh 8 waje i step.
Katwa ka Basuk Thabah (42 snem) na Lawsohtun, Block-I da li booh cha ka Nazareth Hospital haka 11 tarik uni u bnai neidaw ka Severe Anemia kamjooh kawa em ya u COVID-19. Da khlaad ko naka Cardiac Arrest haka 14 tarik uni u bnai heipor 4:30 i janmiet.
Na kiwa dang yoh thymme, ha East Khasi Hills da em ki 124 ngut (chipai-3, paidbah 121), West Garo Hills 26 ngut (High Risk Contact-25, ki wakreh Health-1), East Garo Hills 5 ngut (High Risk Contact-4, ki wakreh Health-1), Ri Bhoi 5 ngut (chipai-1, High Risk Contact-4), East Jaiñtia Hills 4 ngut (High Risk Contact, Factory-1), South Garo Hills 4 ngut (High Risk Contact), West Jaiñtia Hills 4 ngut (High Risk Contact) wa ha North Garo Hills 1 (High Risk Contact).
Na kiwa dang chait da em ha East Khasi Hills 41 ngut, West Garo Hills 13 ngut, Ri Bhoi 5 ngut, East Jaiñtia Hills 3 ngut wa ha South West Khasi Hills 2 ngut.
U Dr. War da pyntip u leh wa na kiwa dang yoh thymme ha East Khasi Hils, 63 ngut toh ki Brothers naka Mathias Institute, Savio Juniorate and SHTC waroh ha Mawlai.
Da pyntip u leh wa 2 ngut ki koidi ka Shillong District Jail kiwa da dep chait da Test wei da yoh biang ki ya uni u khñiang. Katkam wa pyntip u DHS, kini kiwa da chait da yachem ki wa 3 ngut kiwa dang yoh ya uni u khñiang hapoh patok. Kini ki 2 ngut toh kiwa da Test wa yoh ya uni u khñiang ha u Naikhynde wei da chait ki haka 16 tarik uni u bnai, kattæi da pynchong yaki samen samen pyn hapoh ka patok, da pyntip chooh chooh u.
U Dr. War da pynyip u leh wa ki nongmuna kiwa da dep phah Test da em ki 181246 tylli, kiwa ym em chah ktah da em ki 173082 tylli.
Ki bru kiwa da psiah chapoh ka jylla da em ki 48,651 ngut.