2-3 Ton da duna bait ha ki kot ki sla yeiwa kit ki kari na ki Cement Plant, dooh nong ka JHADC

Neiliang u President ka The Association of Meghalaya Traders and Transporters, u Enrico Pasi da thoh u cha u DC ka East Jaiñtia Hills District deilang cha u President ka Jaintia Cement Manufacturers Association heiyatoh wa i dooh bhah i hok ka sorkar lyngba ki dan neidaw wa em ki wym su ya ka Royalty, GST wa ka Cess katkam wa toh u su ki.

Da ong u wa kini ki bru da leh ki yeini deiwa pynbna duna yeiwa kit ki wei kini ki kari toh kiwa pynemkaam da ki dkhot ka Jaintia Hills Cement Manufacturers Association.

Yeini da ye ki wow leh deiwa kit khlem da song yei Cement wa Clinker ha ki churia 50kg wei ym em leh ki laad wow pynrkhiñ hawa thaw khia iwa ka sorkar toh u leh ko neibhah kini ki kari da ong bait ki wa kit ki duna yeiwa kit ki. 

Heiyatoh wa ka Goods and Services Tax (GST) kawa da kheiñ 18% ha i Cement nadooh wa thaw khia ha ki Factory heiwa yeini da leh pyn da ki hi khlem em ki bor kiwa na baar wow pyntikna, wei da duna bait 2-3 Ton na iwa kit hawa pyndap ya ki kot ki sla wei da ye wow leh yeini neidaw khlem da song yei Cement heiwa da kit bait kamtu hapoh ki Bulker Truck.

Ka Royalty wa toh u yoh ka JHADC heiyatoh wa u moochuni wa Clinker toh kawa kheiñ dei yong Ton katkam ka aiñ MMDR Act, 1957 wei manda pynbna duna yeiwa kit, i dooh nong man ko leh ya ka JHADC.

Related posts

Ban joor u Himanta wa emkaam u kset ya u pood ka West Bengal wa Bangladesh

April 17, 2026

Lait kreh ha Jowai Public School wa ha Kiang Nangbah Govt. HS School

April 16, 2026

Kiwi ki dan kam ka Mineral Cess, Transport Tax wa i kynchew cha ka District Mineral Fund leh toh kawa kheiñ dei yong Ton kamtæ kini ki dan leh da duna i yoh neidaw wa kini ki Truck da pynbna ki duna yeiwa kit ki.

Lada kheiñ deiwa pynbna duna da 2-3 Ton kawi ka Truck wei lada 100 tylli ki Truck Bulker chi sngi mih ki na kini ki Cement Plant, i dooh nong man ko da ki klur tangka ha ka GST, Royalty, Cess, Transport Tax wa iwa toh u lai cha ka DMF. 

Kamtæ ka Association of Meghalaya Traders and Transporters da dawa ko wow em i thaw khia wa man laitlooid deilang i booh ya ki CCTV ha ki Gate ki karkhana yow pait yei psiah i mih ki kari yow ye u chim yukheiñ yow yoh yei kheiñsap wa biang.

Da dawa leh wow pynyoo ya ki kot ki sla wa katwon tylli ki Truck wa mih wa lai, ki GST e-Way Bill nadooh u January 2025 chakhmat deilang i su GST, Royalty, Mineral Cess, Transport Tax wa iwa da kynchew cha ka DMF wei lada ym biang wow pynchitom ya kini.

Ki bor District toh u phah ki leh u bru wow pait yeini yow man ka kaam kawa khooid deiwa booh leh ki kyndon yow lait ini i kheiñ duna yeiwa kit u jia i.