Ka Ministry of Jal Shakti, lyngba ka Jal Jeevan Mission (JJM) da pynpoi umkor ko cha 2.82 lak tylli ki manyung hadooh ka 13 tarik uni u bnai iwa da mut wa 44.45% ki manyung da yoh umkor ki ha Meghalaya. Heipor chwa u sdang ya ka JJM da em du 4,550 tylli ki manyung kiwa yoh umkor.
Kat hadooh ka 13 tarik uni u bnai, da em 1,165 tylli ki chnong ha Meghalaya kiwa da yoh 100% ka umkor. Da chna leh ya ki Water and Sanitation Committees (VWSC) ha awjan waroh ki chnong.
Ka Jal Jeevan Mission ha Meghalaya da wanrah ko yaka umdih wa khooid hapoh ka jylla wei deiwa krehlang wa kiwa chong chnong da ye wow pyntikna wa da yoh myntoi kiwa chong chnong khamtam kitu kiwa da em cha rood cha kiar ka imlang sahlang.
Hapoh ka Jal Jeevan Mission da yaleh leh wow pynstiñ yei kaam ki kynthai wa ki khynnah kiwa da hap wow lai kit um na jngai wei ini da man ko leh kam chibynta wow pynskem yei pynbiang um cha waroh kiwa chong chnong.
Hapoh ka ri da em leh palat 2000 tylli ki Laboratory yow Test ya ka um wei ki paidbah ye ki wow phah Test ya ka um hei dor wa duna wei hadooh u Kmaichonglad (Dec) 2022, hapoh Meghalaya da em 30 tylli ki Water Testing Laboratory.
Ka Jal Jeevan Mission toh ka Scheme ka sorkar pyrdi kawa da sdang da u Prime Minister Narendra Modi ha u Naisaphra 2019 wei da booh thong wow pynpoi umkor kamjooh ka umdih wa khooid cha waroh ki manyung wa em cha palatsor kat ha u 2024.
Hadooh ka 16 tarik uni u bnai, da em palat 10.88 klur tylli ki manyung kiwa da yoh umkor. Da em 125 tylli ki District, 1528 tylli ki Block, 82,354 tylli ki Panchayat wa 1, 51, 442 tylli ki chnong kiwa da yoh um pura ha yung ‘Har Ghar Jal’.
