Shillong: U montri rangbah ka jylla u Conrad Sangma da ong u wa ki khynroo khyllood ka jylla wa da ye u lait ya ka exam Union Public Service Commission (UPSC) duna bha ki khamtam na ri-loom Garo.
Yeini da ong u ha ka yalang wa pynman ynne ka sngi yow pynbna paidbah ya ka Scholarship hapoh ka Chief Minister Career Guidance and Counseling Scheme ka wow e Scholarship neibynta ka IAS Coaching ya ki khynroo khyllood ka jylla hei ya krehlang waka Alternate Learning Center (ALS).
Da ong wa ini waroh daw yarap ko chiboon yow ye ki bru yong i wow yakhun wa kiwi ha ka kyrdan yong ka ri.
“Ka sorkar da dep phah ko kattu katni ngut kiwa puræ cha Delhi tangwa katkam ka stat ka juk wa katni ym emkaam wow phah cha Delhi iwa man leh iwa syad tangwa deiwa pynman pyn hapoh ka jylla daw ye i u yarap ya kiwa rap boon.” da ong u Conrad.
“Da rai leh wow e 100% ka Scholarship cha ki 100 ngut kiwa wan cha khmat na ki 200 ngut kiwa da jied i. Daw pynman ya ka Exam kawa daw pynman ha ka 29 tarik uni u bnai ha waroh ki District Headquarter yow yoh kiwa kwah u yoh ya kani ka laad wow embynta lang ki.” da ong u.
Da pyntip u leh wa ya ka Result daw kheiñ da ka ALS wei daw man ko kawa khooid wa suba wei ya ki 200 ngut kiwa da chah jied waroh ka Scholarship da poi ko T. 1.4 Klur kawa daw e cha ki 200 ngut.
“Na ka T. 1.4 Klur, T. 95 lak daw e naka Chief Minister’s Career Guidance and Counseling scheme wei ka T. 95 lak toh neibynta ka 100% Scholarship cha ki 100 ngut kiwa chah jied katkam ka Exam wa daw pynman,” da ong u Conrad.
U National Sales Head ka ALS, u Prateek Bhattarcharya da ong u, “I thaw e sikai daw pynman ha Shillong wa ha Tura wei daw pynman ya ka chi snem wei daw phah ya ki 200 ngut wow mihkhmat ya ka Meghalaya haka UPSC exam kawa daw pynman ha u snem wow wan.
Discussion about this post