Ka Thomas Jones Synod College, Jowai ynne ka sngi da pynman ko ya ka yalang wow sñiawburom ya ka sorkar wa da yoh yarap kani ka thaw sikai kam ka People’s College heiwa u Montri ka chnat Puræ Puthi ka jylla, u Rakkam A Sangma da wan u kam u kongsan hei emlang u MLA ka Jowai, u Wailadmiki Shylla kam u symbood kongsan.
Ha kani ka sngi da emlang leh uwa e buit ka sorkar jylla, u HM Shangpliang, u DC ka West Jaiñtia Hills, u BS Sohliya wa kiwi heiwa u Meshak Shylla uwa man u Chairman ka Governing Body ka College da pynlai u ya ka yalang.
Ka Principal ka College, ka Dr. I. Dkhar da e khublei ko ya ka sorkar kawa da yarap ya ka College kam ka People’s College wei da khana ko ya ka parom wa lai luti kani ka thaw puræ ya kawa da sdang nadooh u snem 1997 lyngba ka KJP Synod.
Katkam wa man katni, ha kani ka thaw puræ em 110 ngut kiwa kreh nadooh kiwa sikai hadooh kiwi tawon (Teaching & Non-Teaching Staff) katwa ki khynnah won em ki 997 ngut wei katni em ko le Stream ka Arts, Science wa Commerce.
U Wailadmiki Shylla da sñiawkmen u wa da ye u poi ha ka thong heiyatoh wa i kreh neibynta ka College wa da tipmit ya ka kam ka People’s College. Da ong u wa ka sorkar da yarap ko chiboon ki College hapoh Ri-loom Jaiñtia nadooh ka Nontalang College, ka Shangpung College wa kiwi kiwi.
Chooh chooh da kynmoo u leh wa heipor wa wan kiwa sikai ka College wow paan yarap na ka sorkar heiwa da sñiaw dooh mynsien u neibhah wa da boon wa yarap ka sorkar tangwa manda lai yachem ya u Montri Rangbah wa kiwi ki Montri, da ye u pynman sakhiat yeiwa da angnood kani ka thaw puræ deiwa pynrap wa kani ka sorkar da pyndep ko yeiwa kular ko.
Da yooluti u leh wa ka poisa wa Rs. 2 Klur tam wow e ka sorkar man-u-snem ya ka College daw myntoi bha ka College wa ki khynnah yong ka.
Neiliang u Rakkam A Sangma da ong u wa ini i kaam da man iwa jop toh neidaw wa booddien u MLA ka Jowai.
Da ong u wa ha ki san snem wa da lai, ka sorkar da pdiang ko wow yarap hadooh 21 tylli ki College ha kylleiñ ka jylla hapoh i yahkhmat u Montri Rangbah ka jylla, u Conrad Sangma.
Chooh chooh da ong u wa emkaam wow emburom ya i chakri wa da wanrah ki Missionary chapoh ka ri khamtam ha thaaiñ mihsngi ka ri khamtam wa da wanrah ki ya ka Gospel, i chait i khiah wa i puræ puthi.
Heijooh i por da kynmoo u ya u (L) PA Sangma uwa man uwa da pawkhmat bha na ka thaaiñ mihsngi heipor wa klam u ha Parliament heiwa da yaroh u ya ki thaw Christan neibhah wa da wanrah ki chiboon i kylla ha ki bru.
Ha kani ka sngi da e leh ya ka chithi People’s College Grant In Aid na ka sorkar cha ki 24 ngut kiwa sikai kani ka College ka wow pynemkaam neibynta u su tulop.
Kiwi kiwa da klam kynthup ki ya u HM Shangpliang, u Rev. CL Laloo uwa man u Moderator ka KJP Synod Mihngi, u WEH Lamin, Vice Principal ka College wa kiwi kiwi.
Da pynphooh ya kani ka sngi da i chaad, i rwai wa kiwi wei da pynkupburom leh ya kiwa sikai kiwa yoh yei kyrdan PhD.
Discussion about this post