I yachem yong ki 10 tylli ki Autonomous Council kiwa em ha thaaiñ North East India ya u Home Minister ka ri, u Amit Shah ha nongbah Delhi ynne ka sngi da man ko kawa mihsoh.
Hawa pyntip yeini na Delhi, u CEM ka KHADC, u Pyniaid Sing Syiem da ong u wa u Amit Shah da kular u wow pyndep yei dawa yong kini ki 10 tylli ki Autonomous Council hapoh chi bnai iwa mut hapoh ka 25 tarik u Naisaphra wow wan hajrong i pynkhreh wow wanrah yei pynkylla ya ka Sixth Schedule ka riti synchaar ka ri.
U Pyniaid da khana u wa ha katai ka yachem, da chna leh ya ka Committee ka wow khlieh da u Montri Khynnah ka Home Ministry ka ri yow pyntoh pynbiang yei dawa yong kini ki 10 tylli ki Autonomous Council wa ki Territorial Autonomous District Council.
Heijooh i por, da pyntip u wa ka yalang kawa ar yong waroh 10 tylli kini ki Autonomous Council wa ki Autonomous District Council daw man ko ha ka 10 tarik u Naisaphra 2024 ha Shillong.
Ki 10 tylli ki Autonomous Council wa ki Autonomous District Council toh ka KHADC, JHADC wa GHADC ha Meghalaya, ka Mara, Lai waka Chakma Autonomous District Council ha Mizoram, ka Tripra Autonomous District Council ha Tripura, ka Bodoland Territorial Autonomous Council, ka Dima Hasao Autonomous Council waka Karbi Anglong Autonomous Council ha Assam.
Discussion about this post