U Montri Rangbah ka Meghalaya, u Conrad K. Sangma ynnin da wai u ya ka thaw ri sniang namo ka Pig Breeding Farm ha Rikwareng, Samanda ka East Garo Hills wei da pynlait paidbah u leh ya ka Rural Backyard Piggery Scheme.
Da ong u wa kini waroh toh yow kynjoh ya ki warep wa em cha cha jngai na sor wei ha kini ki soo snem da leh ya kiwa boon yow pynku yei nong yong ki lyngba kiwa boon ki laad yarap.
“4.5 lak ngut ki warep hapoh ka jylla da emkaam ki wow pynku pynheh yei khih i khan ki,” da ong u Conrad heipor wa wai paidbah ya ka Rural Backyard Piggery Scheme, heiwa 6000 ngut daw yoh myntoi ki da ki khon sniang.
Da ong u leh chong hei mankaam wei kammon sñiaw kiwa yoh myntoi, ka sorkar daw pynku ko cha 15,000 ki wow yoh myntoi na ini.
Ha ka bynta wa nyngkong da booh bhah T. 16.92 klur neibynta ki 6000 ngut ki wow yoh myntoi heiwa daw saam 24,000 tylli ki khon sniang ha kylleiñ ka jylla iwa mut mar soo tylli uwi wa yoh myntoi.
Da khana u leh wa ka sorkar da pyrkhat ko wow paan sa T. 25 klur neibynta ka Rural Backyard Piggery Scheme deiwa yarap poisa da ka jylla wa ka National Livestock Mission ka sorkar India.
Da ong u wa kam chibynta kani ka Rural Backyard Piggery Mission, ka sorkar da pynkrehkaam ko leh ya kawa heh dooh ka Piggery Scheme kawa T. 109 klur hapoh ka jylla wei da yooluti wa ini daw pyndap ko yei duna doh sñiang hapoh jylla heiwa ka sorkar da hap ko wow pynlut T. 600 klur chi snem yow wanrah doh sniang na baar jylla.
Ha kani ka sngi na jrong ki sniang, da saam leh ya ka Cheque cha ki seiñ ki warep hapoh ka FOCUS.
