U Montri Rangbah ka jylla, u Conrad K Sangma da khana u wa ynnin ka sngi da yoh u deilang wa ki Montri ka sorkar MDA-II wow yachem wei yaklam ya kiwa boon ki phang kiwa ka jylla dawa ko hakhmat u Montri Rangbahdooh ka ri, u Narendra Modi ha New Delhi.
Da khana u wa i yaklam toh hajrong i pynbait pood waka Assam, i kwah pynkrehkaam noh ya ka Inner Line Permit (ILP), i tipmit ya ka ktien Khasi wa Garo, i yaklam yasuk wa ka seiñ Hynniewtrep Liberation Council (HNLC) wa kiwi kiwi de ki phang.
U Conrad da ong u wa i yachem wa u Modi toh iwa jrong tam na kiwi ha ki por wa da dep, neibhah da e por u hadooh 25 minit wow yaklam ya kitai ki phang wa emkaam yong ka jylla.
Hawa yatoh wa i pynbait pood, da khana u wa u Modi da pynsñiaw u yei sñiawkhia yeiwa jia wa mih ha khappood para jylla yong ka ri India, wei heijooh i por da yaroh u ya kiwa yahkhmat yong ki jylla ka thaaiñ North East kiwa da chim ya ki laad ki luti wow pynbait yei eh.
U Conrad da khana u wa u Modi da pynsñiaw u yei thrang wow yoo yei yasuk kawa neh chirta hadien wa da yaklam yasuk waka HNLC iwa da lai chakhmat.
Chooh chooh da khana u wa heiyatoh wa i tipmit noh ya ka ktien Khasi wa Garo wa i dawa pynkrehkaam ya ka ILP, u Modi da pynsñiaw u wa em kattu katni i eh hawa yatoh wa kitai ki phang tangwa da kular u wow chimkhia wei wow bichaar ya kini ki phang dawa yong ka jylla.
Discussion about this post