Ka seiñ FKJGP War Jaiñtia Circle hadien wa da yoh ujor na ki paidbah ka thaaiñ, da lai pait ko wei da yoo dei khmat yei sih u sarok NH40E namo u sarok Jowai-Dawki uwa da sih bha ha ki bynta nadooh na Nongtalang cha Dawki.
Ka seiñ da ong ko wa ya uni u sarok dang dep wot u chna ha kini ki kajiak bnai tangwa da chem wa da sih da dap wot u da ki thlu nadooh na Nongtalang hadooh wa poi cha ka thaw psiah cha Bangladesh.
Ka seiñ da kylli ko leh wa ileh wa du hadien 3 bnai uni u sarok da sih wot u wei lada nujor waka poisa wa i rukom pynkrehkaam ym yahaap, ka seiñ da maham ko leh wa kam kini ki rukom kreh habra ymtoh de u jia neini chakhmat.
Da maham joor leh ya kiwon kiwon ki Contractor næ ki Company wym toh u kreh khalær, kreh tangdep ya kiwon kiwon ki kaam pynroi hapoh ka thaaiñ, neibhah ka seiñ da lai booddien ko yeini neipor cheipor.
Ka seiñ da pyntip ko leh wa da lai booh ko dei thoh ha ka 5 tarik uni u bnai ha u Executive Engineer PWD (Roads) Central Division Jowai yow dawa tuklar smat ya ini i kaam khnang yow myntoi u paidbah.
